Ál-Farabı atyndaǵy Qazaq ulttyq ýnıversıtetinde Ushqyshsyz avıasııany damytý ınnovasııalyq ortalyǵy ashyldy. «Aerial Solutions» JShS arasyndaǵy ózara yntymaqtastyq aıasynda ashylǵan ǵylymı-ınnovasııalyq ortalyqta otandyq ushqyshsyz ushý apparattarynyń modelin ázirleý, oqý-óndiristik zerthanalar men synaq polıgonyn qurý, sondaı-aq dýaldy bilim men sertıfıkattaý baǵdarlamasyn júzege asyrý josparlanyp otyr.
Ortalyqtyń ashylýyna QazUÝ basqarma tóraǵasy-rektor Janseıit Túımebaev, «Aerial Solutions» JShS Avıasııalyq oqý ortalyǵynyń bas dırektory Perızat Qudaıbergenova, Qorǵanys mınıstrligi Ushqyshsyz ushý júıelerin damytý jáne qoldaný departamentiniń basshysy Isa Teımýrazuly, Qorǵanys mınıstrligi Áýe qorǵanysy kúshteri Áskerı-áýe kúshteri qolbasshylyǵy bas ortalyǵynyń basshysy Sáken Rústemov, Ulttyq qaýipsizdik akademııasynyń kafedra meńgerýshisi Artýr Imashev, Qazaqstan avıasııa ákimshiligi Lısenzııalaý departamentiniń dırektory Ádiljan Sultanov, belgili ǵalymdar men oqytýshylar qatysty.
Jıyndy QazUÝ basshysy Janseıit Túımebaev ashyp, ortalyqtyń iske qosylýy elimizdiń tehnologııalyq damý jolynda erekshe mańyzy bar ekenin jetkizdi.
«Memleket basshysy Qasym-Jomart Toqaev jasandy ıntellektini damytý jónindegi keńestiń alǵashqy otyrysynda «Bizdiń ult retinde básekege qabilettiligimiz ben egemendigimiz osy tehnologııany qalaı paıdalanatynymyzǵa tikeleı baılanysty. Ár maman sıfrlyq daǵdylardy jetik meńgerip, jasandy ıntellektiniń múmkindikterin jumys barysynda tıimdi qoldana bilýi qajet» dep atap ótken bolatyn. Sondaı-aq úsh jyl ishinde elimizdi tolyq sıfrlandyrýǵa baılanysty strategııalyq maqsat qoıdy. Osy mindetti júzege asyrýda ǵylymı qaýymdastyq pen birlestikterge zor jaýapkershilik júkteldi. QazUÝ-da Ushqyshsyz avıasııany damytý ınnovasııalyq ortalyǵy ashylýy – aýqymdy ǵylymı jobalardy iske asyrýǵa, zamanaýı drondardy jasap, qurastyrýǵa, bilikti mamandardy daıarlaýǵa, stýdentterdiń taǵylymdamadan ótýine múmkindik beredi. Munda jasalǵan drondar ekonomıkanyń túrli salasynda tıimdi qoldanylatyn bolady. Birlesken ortalyq óndiris pen ýnıversıtet arasyndaǵy mańyzdy seriktestiktiń naqty nátıjesin kórsetedi. Jobanyń iske asýy elimizdegi sıfrlyq ınfraqurylymnyń damýyna, azamattyq ushqyshsyz avıasııa salasyndaǵy memlekettik strategııany júzege asyrýǵa eleýli serpin beredi», dedi rektor.
Al «Aerial Solutions» JShS Avıasııalyq oqý ortalyǵynyń bas dırektory P.Qudaıbergenova Qazaq ulttyq ýnıversıtetiniń bazasynda ashylǵan Ushqyshsyz avıasııany damytý ınnovasııalyq ortalyǵy ǵylymdy, bilimdi jáne zamanaýı ushqyshsyz tehnologııalardy biriktirip, halyqaralyq standarttarǵa sáıkes mamandar daıarlaýǵa jol ashatynyn atap ótti. Onyń aıtýynsha, ýnıversıtettegi akademııalyq baza sapaly tájirıbelik bilimdi qamtamasyz etip, ónerkásip, aýyl sharýashylyǵy jáne sıfrlyq monıtorıng salalarynyń damýyna yqpal etpek. Ortalyq jas mamandarǵa ashylǵan jańa múmkindik, elimizdegi avıasııalyq jobalardy álemdik deńgeıge shyǵarýǵa yqpal etetin bolady.
Sondaı-aq Qorǵanys mınıstrligi Áýe qorǵanys kúshteri bas basqarmasynyń jetekshisi Sáken Rústemov ulttyq ýnıversıtetpen bul saladaǵy yntymaqtastyqtyń mańyzyna toqtalyp, elimizdegi áýe qozǵalysy salasynyń damýyna eleýli úles qosatyn ınnovasııalyq jobalardyń damýy ushqyshsyz avıasııa salasynyń jańa deńgeıge kóterilýine oń yqpal etetinin baıandady. Sonymen birge «Aerial Solutions» kompanııasy avıasııalyq oqý ortalyǵynyń basshysy Máýlen Mustafaev munda zamanaýı kadrlar daıarlanatynyn jetkizdi.
Onyń aıtýynsha, ortalyq bazasynda azamattyq jáne memlekettik avıasııa salasyna mamandar daıarlaýda qysqa kýrstar ótedi. Sonyń barysynda ınjenerler, qurastyrýshylar biliktiligin arttyryp, ǵylymı zertteý jáne tájirıbelik-konstrýktorlyq jumystarǵa qatysady. Munymen qosa QazUÝ-men birlese otyryp, bıyl jańa oqý jylynan bastap joǵary bilimdi kadrlar daıarlanbaq. Bakalavrda oqıtyn mamandar ushqyshsyz tehnologııalardy qurastyrý, basqarý baǵytynda bilim alady. Ortalyqtyń ashylýy – áskerde azamattyq boryshyn ótep júrgen sarbazdarǵa da úlken múmkindik. Olar Otan aldyndaǵy boryshyn 1 jyl ótegennen keıin 2 jyl jańa oqý jylynan bastap osy baǵytta bilim alady. Osy oraıda «Sarbaz+» jobasymen yntymaqtastyq kózdelip otyr. Innovasııalyq ortalyqta drondar men servısterdi ishki jáne halyqaralyq naryqqa shyǵarý, ınnovasııalyq startaptardy qoldaý, kommersııalandyrý iske asady.
Búginde Qazaq ulttyq ýnıversıtetiniń aýmaǵynda 2 myń sharshy metr aýmaqta dron qurastyrý óndirisi ornalasqan. Endi az ýaqytta bilikti ınjenerler elimizdegi dron óndirisin qolǵa alyp, qorǵanys salasy men aýyl sharýashylyǵyna arnalǵan ushqyshsyz ushý apparattaryn qurastyratyn bolady.
ALMATY