Elimizde shyny ónerkásibin damytýǵa aıryqsha kóńil bólinip otyr. Qurylys qarqyny men ınfraqurylym jobalarynyń kóbeıýi, qaıta óńdeý mádenıetiniń ornyǵýy shynyǵa degen suranysty ósirip, osy salanyń mańyzyn aıqyndaı tústi. Keıingi jyldary ishki naryqta zamanaýı áınek óndiretin óndiris oryndary kóptep ashyla bastady. Sondaı bir joba Áýlıeata jerinde qolǵa alyndy.
Shyny óńdeý óndirisin damytýǵa den qoıǵan «Dala Glass» kompanııasynyń qurylǵanyna sanaýly jyl ǵana boldy. Az ýaqytta aýqymdy jobalardy júzege asyrýǵa den qoıǵan kompanııa basshylyǵy Taraz tórinde de shyny óńdeý óndirisin órkendetip jatyr. Jahandyq deńgeıdegi ónim shyǵarýǵa basymdyq bergen jańa zaýyttaǵy jumys qarqyny kóńil toǵaıtady.
Zaýyt dırektory Qýanysh Serikbaevtyń aıtýynsha, jańa óndiris ornynda úsh birdeı avtomattandyrylǵan jeli ornatylǵan. Maman keltirgen derekke júginsek, shyny kesý, óńdeý, kópqabatty qaýipsiz shyny óndirý men shyny paketter jınaý jelisi sapaly ónim shyǵarýǵa barynsha múmkindik týǵyzady. Mundaǵy barlyq qural-jabdyq ýaqyt suranysyna saı suryptalyp alynǵan.
«Biz birinshi kezekte sapaly ónim óndirýge basymdyq berip otyrmyz. Ol úshin halyqaralyq standartqa saı jabdyqtar satyp aldyq. Álemdik deńgeıdegi ónim shyǵarý úshin qural-jabdyqtar sol deńgeıge saı bolýy kerek dep esepteımiz. Sondyqtan bul máselege aıryqsha nazar aýdarǵanymyzdy aıta ketken jón. Qajetti qurylǵylardy sapasyna saı barynsha zerttedik, zerdeledik. Negizgi maqsat – shynyny óńdeý, qurylys pen ıntererge arnalǵan zamanaýı energııa únemdeıtin sheshimder usyný. Jumysymyzdy osy baǵytta órkendetýge den qoıyp otyrmyz. Árıne, básekege qabiletti ónim óndirý úshin qoldan kelgenshe ter tógip jatyrmyz. Bizge eń mańyzdysy – tutynýshy suranysyn qanaǵattandyrý. Sonda ǵana naryqta óz ornymyzdy aıqyndaıtynymyzǵa bek senimdimin. Álemdik deńgeıdegi ónim shyǵarý úshin qaǵıdatymyzdy berik ustanamyz. Alǵan baǵytymyzdan aınymaımyz», deıdi zaýyt dırektory.
Jańa kásiporyn basshysynyń aıtýynsha, sý jańa zaýytta qyzmetkerlerdiń alańsyz jumys isteýine qoldan kelgenshe barlyq jaǵdaı qarastyrylǵan kórinedi. Zaýyttyń jalpy aýmaǵy 6 myń sharshy metrdi qurap otyr. Munda eki óndiristik seh, keńse ǵımaraty men zaýyt qyzmetkerlerine arnalǵan bólmeler bar.
«Bizdiń zaýyttyń ónim óndirýdegi qýattylyǵy aıyna 2 myń sharshy metrdi quraıdy. Bul degenimiz jylyna 240 myń sharshy metr daıyn ónim shyǵara alatyn múmkindigimiz bar degen sóz. Nátıjesinde, jyldyq qarjylyq aınalym 5 mlrd teńgeni quraıdy. Árıne, alǵa qoıǵan aýqymdy josparlar da barshylyq. Sol oılarymyzdy júıeli túrde júzege asyrý úshin áli biraz jumys isteımiz. Bastapqy kezeńde birinshi sehty tolyqtaı iske qosqanymyzdy aıta ketken jón. Elýden astam jergilikti azamat turaqty jumys ornymen qamtyldy. Ekinshi óndiristik seh tolyq qýatynda jumys istegen kezde taǵy da elý jumys orny ashylady. Sodan soń, óndirilgen áınek te, aqshalaı aınalym da eki esege artatynyna senimdimiz», deıdi Q.Serikbaev.
Zamanaýı áınek óndirisin órkendetýge den qoıǵan zaýyt basshylyǵy elimizde jasalǵan ulttyq ónimniń sapasyn jańa deńgeıge kóterýge basymdyq berip otyr. Sol arqyly otandyq brendti qalyptastyrsaq degen nıeti bar.
«Aýqymdy joba bastalǵannan bastap, iske asyrylǵanǵa deıin aıryqsha qoldaý kórsetken jergilikti atqarýshy bılik ókilderine alǵys aıtamyz. Elimizde shyny ónerkásibin damytýǵa aıryqsha kóńil bólinip otyrǵany kóńil qýantady. Árıne, otandyq ónimdi ishki naryqta ótkergennen eshkim utylmaıdy. Áıtse de óz elimizde óndirilgen ónimdi kórshiles elderge eksportqa shyǵarýdyń da mańyzy zor. Aldaǵy ýaqytta osy baǵytta jumysty jandandyratyn bolamyz», deıdi zaýyt dırektory.
Qalaı desek te qazir «Dala Glass» kásipornynda jumys qarqyny údeı túsken. Munda eńbek etip jatqan jergilikti mamandar sapaly ónim shyǵarýǵa aıanbaı ter tógip jatyr. Zaýyt qyzmetkerleri óndirgen ónimge degen suranys ta artyp otyr.
Taraz