Atyraý oblysy Qyzylqoǵa aýdanyna qarasty Jangeldın aýylynda 2025 jylǵy 25 jeltoqsanda habar-osharsyz joǵalyp ketken bir otbasynyń tórt múshesine qatysty qylmystyq isti tergeý jumystary jalǵasyp jatyr, dep habarlaıdy Egemen.kz.
О́ńirdiń bas polıseıi Ońal Bekıev jedel keńes ótkizip, onda tergeý barysy men quqyq qorǵaý organdarynyń aldaǵy áreketteri talqylandy.
«Keńes barysynda júrgizilip jatqan jedel-izdestirý sharalarynyń nátıjeleri tyńdalyp, tergeýdiń negizgi baǵyttary aıqyndaldy. Departament basshysy qylmystyq isti qatań zań talaptaryna saı, jan-jaqty ári obektıvti tergeýdi qamtamasyz etýdi, kelip túsetin árbir jedel aqparatty muqııat jáne ýaqtyly tekserý qajettigin atap ótti», delingen polısııanyń baspasóz qyzmeti taratqan habarlamada.
Qazirgi ýaqytta qylmystyq is Atyraý oblysy polısııa departamentiniń erekshe baqylaýynda. Jedel-izdestirý jáne tergeý sharalary táýlik boıy júrgizilip jatyr.
Eske sala keteıik, bir aıdan astam ýaqyt buryn óńirdiń tórt turǵyny habar-osharsyz ketken. 25 jeltoqsanda Atyraý qalasynyń turǵyny polısııaǵa júginip, aǵasynyń otbasymen birge uzaq ýaqyt boıy baılanysqa shyqpaǵanyn habarlaǵan. Olar qarasha aıynda úılerinen shyǵyp ketip, áli kúnge deıin oralmaǵan. Qazirgi tańda qaza bolǵan erli-zaıyptynyń 33 jáne 35 jastaǵy qyzy men kúıeý balasyna izdeý jarııalanǵan.
Joǵalǵandardyń uıaly telefondary Qazaqstan aýmaǵynda qosylyp-óshirilip otyrǵan, sońǵy ret Shymkent qalasynda tirkelgen.
Izdeýde júrgen kúıeý bala Sultan Sársemalıev týraly aqparat Bas prokýratýranyń quqyqtyq statıstıka jáne arnaıy esepke alý organdarynyń portalynda jarııalanǵan. Izdeý isi 2026 jylǵy 8 qańtarda tirkelgen.
Qaza tapqandardyń týystary 66 jastaǵy Maqsot Muqanǵalıev pen onyń jubaıy qaıtys bolǵannan keıin de daýys habarlamalaryn alǵandaryn aıtqan. Jaqyndarynyń sózinshe, habarlamalar kelininiń telefonynan jiberilgen, alaıda boljam boıynsha, ol kezde áıeldiń ózi de qaza tapqan, al belgisiz bireý buryn jazylyp alynǵan aýdıohabarlamalardy jibergen bolýy múmkin.
2026 jylǵy 17 qańtarda oblystyq tótenshe jaǵdaı departamenti 32 jastaǵy Naýryz Muqanǵalı men 35 jastaǵy Meıramgúl Qarabalınany resmı túrde izdeý toqtatylǵanyn habarlady.