ASTANA. 24 naýryz. Qazaqstandyq 20 jasar kásipqoı boksshy Roman Jaılaýovtyń kelesi qarsylasy anyqtaldy. Ol 13 sáýir kúni Ońtústik Afrıka respýblıkasynyń Iohannesbýrg qalasyndaǵy Emperors Palace arenasynda jergilikti boksshy Lýıanda Djakomen qolǵap túıistiredi. Bul týraly BoxingNews.kz habarlady.
Reıtıngilik statýsy bar bul shaıqas 6 raýndtan turady. Al boks keshiniń basty shaıqasy OAR-dyń birinshi orta salmaqtaǵy chempıondyǵynyń belbeýi úshin jergilikti sportshylar Grant Fıýrı men Ýorren Iýberttiń arasynda ótedi. Kempton Parkte ótkeli turǵan urystyń uıymdastyrýshysy retinde Gennadıı Golovkın men Martın Mıýrreıdiń jekpe-jegin jaryqqa shyǵarǵan Golden Gloves promoýterlik kompanııasy kórinbekshi.
Atalmysh kompanııanyń basshysy, ońtústikafrıkalyq belgili promoýter Rodnı Berman ázirge jeńilistiń ashy dámin tatyp kórmegen qazaqstandyq kásipqoı boksshy Roman Jaılaýov jóninde jaqsy pikir bildirdi.
Golden Gloves promoýterlik kompanııasynyń basshysy World Boxing News.net basylymyna bergen suhbatynda Jaılaýovtyń jańa Gennadıı Golovkın bolýǵa tolyq múmkindigi bar ekenin atap ótti. Bermannyń aıtýynsha, Jaılaýovtyń stıli jas kezindegi Golovkındi eske túsiredi. «Men bul jigit týraly talaı nárseni estip kelemin. Biraq óziń ony istiń ústinde kózińmen kórgenge deıin birdeńeni ashyp aıtýyń qıyn ǵoı. Biz qazir jańa Golovkın bolatyn adamdy izdep júrmiz. Eger Roman tym bolmaǵanda, Golovkınniń jarty deńgeıine jete alsa, odan dınamıt shyǵar edi. Aldaǵy ýaqytta onyń ózin qalaı tanytatynyn kórermiz», - dedi belgili promoýter.
Jasy qazir 20-daǵy Roman Jaılaýov Shymkentte týǵan, Astanada turady. Kásipqoılar rıngindegi tusaýy 2012 jyly 18 jasynda kesildi. Qazir onyń esebinde 13 shaıqastan 13 jeńis bar. Boksshy bulardyń 8-in merziminen buryn aıaqtady.
Jaılaýov – Azııa WBC (Asian Boxing Council) boks keńesi men Panazııalyq boks assosıasııasy (PABA) versııasynyń jartylaı orta salmaqtaǵy (63,5 kg-ǵa deıin) chempıony.
Aıta ketý kerek, Romannyń qarsylasy Lýıanda Djako óziniń buǵan deıingi barlyq 9 shaıqasyn birinshi jartylaı orta salmaqta ótkizip keldi.
Damır Qojamqul.