Qyzylordada ótken Ulttyq quryltaıda Memleket basshysy adamzat qaýyrt dáýirge qadam basqanyn aıtyp, úırenshikti ómirimiz túbegeıli ózgergenin jetkizdi.
Prezıdent aıtqandaı, jańashyl tehnologııalar jańa orta qalyptastyrdy.
«Jasandy ıntellekt zamanyna beıimdele bilgen, soǵan qarap tirshiligin túzgen, tipti jańa úderisterge naqty ári belsene qatysqan elder ǵana tabysqa jetpek. Sondyqtan Qazaqstan sıfrlandyrý isin qarqyndy damytyp, jeke jáne qoǵamdyq ómirdiń barlyq salasyna jasandy ıntellektini engize bastady», dedi Qasym-Jomart Kemeluly.
Áıtse de Memleket basshysy Sıfrlandyrý jáne jasandy ıntellekt jyly sán qýyp, urandatý úshin jarııalanbaǵanyn da eske saldy. Ras, bul sheshim Úkimet múshelerine naqty mindetter júktep otyr.
Osy oraıda memlekettik qarjy júıesiniń sıfrlyq transformasııasyna jetekshilik etetin adam retinde buǵan qatysty óz kózqarasymdy jetkizýdi oryndy dep sanaımyn. Tutastaı alǵanda, kez kelgen tehnologııanyń kózdegen maqsaty – adamdarǵa qolǵabys etý. Bul eńbek ónimdiliginde, operasııalyq úderisterdiń tıimdiliginde, sol sekildi qyzmet sapasynyń jaqsarýy men qaǵazbastylyq syndy bıýrokratııalyq kedergilerdiń azaıýynan baıqalýǵa tıis.
Qýantarlyǵy sol, Qarjy mınıstrligi bul baǵytta birshama jumysty qolǵa aldy. Osyndaı ozyq sheshimderimizdiń biri – Kásipkerdiń biryńǵaı jeke kabıneti. Atalǵan joba qazir qanatqaqty rejimde iske qosylǵan. Ony qatardaǵy platforma retinde qabyldaý qate. Bul – memleket pen bıznestiń ózara baılanysyn jaqsarta túsetin tyń júıe jáne ol adamdardyń naqty qajettilikterine baǵdarlanǵan. Iаǵnı kásipker ýaqytyn túrli júıede qajetti qyzmetterdi izdeýge emes, kerisinshe kásibin damytýǵa kóńil bólýge tıis. Bizdiń sıfrly ónimdi qolǵa alýdaǵy maqsatymyz da osy bolatyn.
Uzaq jyl otandyq bıznes ókilderine birneshe aqparattyq platformada jumys isteýge týra keldi. Kásipkerdiń biryńǵaı jeke kabıneti munyń bárin birtutas sıfrlyq keńistikte biriktirip, Qarjy mınıstrliginiń qyzmetterine bir jerden kirýge jol ashady. Onda kompanııa men onyń qyzmetteri týraly negizgi málimetter, Qarjy mınıstrligi júıeleriniń barlyq habarlamasy, servıspen jumys isteý kezinde kemshilikterdi boldyrmaýǵa kómektesetin keńester qamtylǵan.
Jasandy ıntellekt bıznes-kómekshisine erekshe toqtalǵym keledi. Ol salyq máselelerin sheshýge kómektesip, deklarasııalardy toltyrý tártibi boıynsha keńes berip, mindettemelerdi eske salady. Buǵan qosa chekter men iskerlik belsendilik derekteri negizinde JI jańa kásipti bastaýǵa arnalǵan jaıly lokasııany (oryndy) tańdaýǵa kómektesedi. Sondaı-aq memlekettik satyp alýlar men tenderlerge qatysý múmkindikteri týraly aqparatty kórsetýge qaýqarly. Qazir boljam jasaý fýnksııasy Astana qalasy boıynsha jumys istep tur. Bolashaqta onyń geografııasyn birizdi túrde keńeıtemiz.
Biz bul platformany damý kezeńinde sanaly túrde qoldanysqa engizip otyrmyz, osy arqyly júıe kásipkerlik qoǵamdastyqpen birge qalyptasyp, bıznestiń naqty suranystaryna ıkemdeledi.
Áset TURYSOV,
Qarjy vıse-mınıstri