Apennın túbeginde alaýy tutanatyn XXV qysqy Olımpııa oıyndarynda jeńis tuǵyryna kóteriledi dep senip otyrǵan elimizdiń basty úmitteriniń biri short-trektiń has sheberi Denıs Nıkısha ekeni sózsiz. Búgingi maqalamyzda sol sportshy týraly áńgime qozǵaýdy jón kórdik.
Denıs 1997 jyly 7 tamyzda Kókshetaý qalasynda dúnıege keldi. Mektepte júrgen kezinde túrli sporttyń basyn shaldy. Karatemen, júzýmen, shahmatpen, tipten toǵyzqumalaqpen de shuǵyldandy. Keıinnen tańdaýy short-trekke túsip, oǵan myqtap den qoıdy. Sporttyń bul túrinde Nıkısha eleýli tabysqa qol jetkizdi. Atap aıtsaq, 500, 1000 metrlik saıysta ol 2014 jyly Sochı Olımpıadasynda besinshi oryn alyp, Erzýrýmde ótken jastardyń álem birinshiliginde qola medaldy enshiledi. Kelesi jyly Osakada sol kórsetkishin qaıtalady.
Eresekter dýyna túbegeıli qosylǵannan keıin de jerlesimiz jankúıerlerin jerge qaratqan joq. Ol sońǵy eki álem chempıonatynda kúmis medaldy moınynda jarqyratty. 2014 jyly Rotterdamda Qytaıdyń azamattyǵyn alǵan Ońtústik Koreıanyń týmasy, Olımpııa oıyndarynyń jeńimpazy, 9 dúrkin álem chempıony Lın Sıaoszıýnnen ǵana qalyp qoıdy. 2025 jyly Beıjińde Olımpıada men álemniń tórt dúrkin chempıony, kanadalyq Stıven Dıýbýaǵa jol berdi. Odan bólek, Denıs Dúnıejúzilik ýnıversıada da tórt ret úzdik úshtikti túıindep, Álem kýboginde san márte oljaǵa keneldi. 2018 jyly Phıonchhan, 2022 jyly Beıjiń Olımpıadalarynda baq synady.
Bul kúnderi Denıs Aq Olımpıadaǵa qyzý daıarlanyp jatyr. Oqý-jattyǵý jıyny kezinde suhbattasqanymyzda: «Daıyndyq jospar boıynsha júzege asyp jatyr. Komanda músheleriniń kóńil kúıleri kóterińki. Barlyǵymyz da Olımpıadada barymyzdy salyp, júlde alýdy kózdep otyrmyz. Menen kópshiliktiń 500 metrlik saıysta júlde kútetini anyq. Bul – meniń ǵana emes, Abzal Ájiǵalıevtiń de oń jambasyna keletin qashyqtyq. Qazir ekeýimiz birge jattyǵyp, bir-birimizge básekeles bolyp júrmiz. Odan ol da utady, men de utamyn. Básekelestik bar jerde nátıje de bolady. Sondyqtan esh aıanyp jatqan joqpyz. Meniń de, Abzaldyń da maqsaty – elimizdiń Týyn kókte jelbiretý, sáti kelse Ánuranymyzdy shyrqatý», dep aǵynan jaryldy.
Qazir elimizdiń quramasyn bilikti bapker Pıotr Gadımov jattyqtyrady. Oǵan 2024 jyldan beri Nıderlandtan arnaıy shaqyrylǵan Vılma Býmstra kómektesip júr. Qyzǵaldaqtar eliniń ókili kezinde AQSh-tyń ulttyq komandasynyń bas bapkeri bolyp, Eýropanyń birqatar memleketinde jemisti eńbek etti. Maıtalman maman keńesshi-jattyqtyrýshy qyzmetin atqarady. Short-trekshilerimiz Olımpıadaǵa 4 aqpanda attanady. Sporttyń bul túrinen alǵashqy júldeler 10 aqpanda sarapqa salynady.