«Ornynda bar ońalar» deıdi halqymyz. Biz táýelsizdik alǵannan bergi jyldar ishinde ulttyq qundylyqtarymyzdy qalpyna keltirip, tilimizdiń de, dinimizdiń de, tarıhymyzdyń da óshkenin jandyryp, baryn baıandy ete bastadyq. Oǵan kúni keshe elimizdiń aıdyny men aıbaryna aınalǵan arý Astanada birden 14 kóshe ataýynyń ózgerýi dálel bolsa kerek.
«Astanadaǵy kóshelerdiń negizgi bóligi qazaq tilindegi ataýlarǵa ıe. Bul Astana qalasyndaǵy kóshe ataýlarynyń 93 paıyzy qazaq tilinde degen sóz. Elordada 934 kóshe bolsa, onyń negizgi bóligine memlekettik tilde ataý berilgen. Bul rette elordamyz úlgi tutýǵa laıyq», deıdi Astana qalasy tilderdi damytý basqarmasynyń basshysy Erbol Tileshov.
«Eshten – kesh jaqsy» degendeı astana astana bolǵan 16-17 jyldyń ishinde qazaqtyń uly akademıgine áli kúnge deıin kóshe aty buıyrmasa, búgin sol olqylyqtyń orny toldy: elordadaǵy Levon Mırzoıan atyndaǵy kóshe Astana qalalyq máslıhatynyń 5-shaqyrylǵan kezekten tys sessııasynyń sheshimimen Qanysh Sátbaev kóshesi bolyp ózgertildi.
Buǵan deıin respýblıkalyq merzimdi basylymdar men elektrondy buqaralyq aqparat quraldarynda talaı márte kóterilip, qoǵam talqysyna salynǵan Astanadaǵy Mırzoıan kóshesi budan bylaı qazaqtyń tuńǵysh akademıgi Qanysh Sátbaevtyń esimimen atalatyn boldy. Tóreshi – ýaqyt degen osy.
Astana qalasynyń onomastıkalyq komıssııasy Úkimet janyndaǵy Respýblıkalyq onomastıka komıssııasymen kelisilgen kóshege ataý berý jáne qaıta ózgertý týraly jekelegen azamattardan, qoǵamdyq uıymdar men jurtshylyq ókilderinen kelip túsken ótinishter men usynystardy qarap, tómendegideı qorytyndyǵa keldi. Ony Astana qalalyq máslıhatynyń sessııasynda depýtattar biraýyzdan bekitti. Endeshe, alty alash jurtyna jaǵymdy jańalyq jetkizip, súıinshi suraýdyń reti kelip-aq tur.
Sonymen, Astana qalasyndaǵy 119-kóshege Shyńǵys Aıtmatovtyń, E-352 jobalyq kóshesine Býdapesht, 142-jobalyq kóshesine О́zbekáli Jánibekovtiń, 209-jobalyq kóshesine Uzaq batyrdyń, 203-jobalyq kóshesine Jámeńke abyzdyń, 188-kóshege Sháımerden Qosshyǵululynyń, 200-kóshege Ilııas Omarovtyń, 59-jobalyq kóshesine Jantaı batyrdyń, E-487 jobalyq kóshesine Zeıin Shashkınniń, E-107 jobalyq kóshesine Ámına О́mirzaqovanyń, Nurǵısa Tilendıev oramyna Aspandııar Kenjınniń, Jeruıyq kóshesine (3-4 pıket) Raqymjan Dúısenbaevtyń, L.Mırzoıan kóshesine Qanysh Sátbaevtyń esimin berý týraly usynystar qoldaý tapty. Sondaı-aq, Daraboz kóshesi men Asqar Toqpanov kósheleri biriktirilip, Asqar Toqpanov kóshesi dep qaıta atalatyn boldy.
Astana qalasy aldaǵy ýaqytta da osyndaı ónegeli isterdiń uıytqysy bola bersin!
«Egemen-aqparat».