Konstıtýsııaǵa engiziletin ózgerister Qazaqstan qoǵamynyń bolashaqqa baǵdarlanǵan ádil ári myqty memleket qurýǵa degen suranysyn aıqyn kórsetedi. Konstıtýsııalyq reforma jónindegi komıssııanyń úshinshi otyrysynda «Keleshek» jastar keńesiniń basshysy Gúlzıra Atabaeva osyndaı pikir bildirip, usynylyp otyrǵan túzetýlerdiń jastar úshin strategııalyq mańyzyn atap ótti, dep habarlaıdy Egemen.kz.
Onyń aıtýynsha, qarastyrylyp jatqan konstıtýsııalyq bastamalar ózara logıkalyq turǵydan úılesip, dúnıetanymdyq negizderden bastap sıfrlyq dáýirdegi jeke tulǵany qorǵaýǵa deıingi kepildikterdiń tutas júıesin qalyptastyrady. Ásirese bilim berýdiń zaıyrly sıpatyn naqty bekitý jáne dindi memleketten bólý qaǵıdattaryn Ata zań deńgeıinde aıqyndaý ýaqyt talabynan týyndap otyr.
Gúlzıra Atabaeva bilim berýdiń zaıyrly sıpatyn bekitý jastar úshin tek ıdeologııalyq emes, naqty praktıkalyq máni bar ekenin atap ótti.
«Jastar úshin bul abstraktili emes, praktıkalyq másele. Mektep – bul teń múmkindikter men dástúrlerdi qurmetteý keńistigi. Konstıtýsııadaǵy tikeleı norma tárbıe men bilim berý júıesi úshin aıqyn baǵdar bolady», dedi ol.
Aıdarbek Qojanazarov: Konstıtýsııalyq reforma – jas urpaqqa baǵyt, ekonomıkaǵa serpin
Sondaı-aq dindi memleketten bólý qaǵıdatyn konstıtýsııalyq deńgeıde naqtylaý qoǵamdyq kelisimdi nyǵaıtýǵa qyzmet etedi. Onyń pikirinshe, bul ártúrli kózqaras pen nanym-senimge ıe jastar úshin memlekettiń beıtarap ári bárine teń qatynas ustanatynynyń kepili.
«Bul jastar úshin túrli kózqaras pen nanym-senimge qaramastan, memlekettiń bárine beıtarap jáne teń bolyp qalýynyń kepili. Osyndaı sezimtal saladaǵy konstıtýsııalyq normanyń aıqyndylyǵy qoǵamdyq kelisim men bılik ınstıtýttaryna degen senimdi nyǵaıtady», dedi ol.
Aıdos Sarym: Jańa Parlamenttiń ókileti keńeıedi
«Keleshek» jastar keńesiniń basshysy shyǵarmashylyq erkindik, sóz bostandyǵy jáne zııatkerlik menshikti qorǵaý kepildikterin kúsheıtýge baǵyttalǵan bastamalardy da tolyq qoldaıtynyn jetkizdi. Onyń aıtýynsha, qazirgi jastar ıdeıalar, sıfrlyq kontent pen ınnovasııalar ortasynda ómir súrip jatyr, al zııatkerlik eńbekti senimdi qorǵamaıynsha ǵylymdy, mádenıetti jáne shyǵarmashylyq ekonomıkany damytý múmkin emes.
«Qazirgi jastar ıdeıalar, kontent jáne ınnovasııalar ortasynda ómir súredi. Zııatkerlik eńbekti naqty qorǵaýsyz ǵylymdy, mádenıetti jáne shyǵarmashylyq ekonomıkany damytý múmkin emes. Bul qaǵıdattardy konstıtýsııalyq bekitý – eldiń zııatkerlik áleýetine ınvestısııa», dedi spıker.
Qorytyndylaı kele, Gúlzıra Atabaeva Konstıtýsııaǵa zamanaýı uǵymdardy engizý sıfrlandyrý men jasandy ıntellekt qarqyndy damyǵan kezeńde Qazaqstannyń ornyqty ári tabysty damýyna jol ashatynyn atap ótti. Onyń pikirinshe, usynylyp otyrǵan ózgerister qoǵamnyń aıqyn erejelerge, bolashaqqa senimmen qaraıtyn kúshti jáne ádil memleketke degen suranysyn tolyq ári dál beıneleıdi.
Isıdor Borchashvılı: Konstıtýsııalyq reforma – quqyqtyq birlik pen adamǵa baǵdarlanǵan tańdaý