Eńbek naryǵynyń talabyna qaraı jumysshyǵa suranys jaz aılarynda kúrt kóbeıse, qysta saıabyrlaıtyny bar. Enbek.kz Elektrondyq eńbek bırjasyndaǵy aqparatqa sensek, jeltoqsanda jumys berýshiler 109,6 myń bos jumys ornyn jarııalasa, jumys izdeýshiler 71,5 myń túıindeme ornalastyrǵan. Qarashamen salystyrǵanda bos oryndar sany 8,4%-ǵa (8,5 myń) artqan, túıindemeler 29,4%-ǵa (29,8 myń) qysqarǵan. Osylaısha, jumys kúshine suranys usynystan asyp tústi.
Suranys qurylymynda burynǵydaı áleýmettik, bazalyq salalar jetekshi orynǵa ıe. Mysaly, ótken aıda bos jumys orny bilim salasynda kóp tirkeldi. Naqtylasaq, jumys berýshiler 23,3 myń oryn usynsa, bul jalpy kólemniń 21,3%-yn quraıdy. О́zge qyzmet túrlerine tıesili kórsetkish osyǵan jýyq boldy – 23,2 myń bos oryn (21,2%). Sol sekildi aýyl, orman, balyq sharýashylyǵynda da joǵary suranys saqtalyp, 18,7 myń bos jumys orny jarııalanǵan (17,1%). Osy úsh baǵyt jeltoqsanda jarııalanǵan barlyq bos oryndardyń shamamen 60%-yn qamtyǵan. Sondaı-aq densaýlyq jáne áleýmettik salada (7,2 myń bos oryn), óńdeýshi ónerkásipte (6,2 myń), kóterme jáne bólshek saýdada (6,1 myń), qurylys salasynda (3,8 myń bos oryn) da suranys saqtalǵan. Bul degenińiz, jyldyń sońyna qaraı da jumys berýshiler ekonomıkanyń negizgi salalary úshin qyzmetkerlerdi belsendi túrde izdegenin kórsetedi.
Jumys izdeýshilerge toqtalsaq, keıingi aılarda áleýmettik jáne keńse jumysymen baılanysty mamandyq ıeleri erekshe belsendi boldy. Eń jıi jarııalanǵan túıindemeler esepshilerge (1 463), zańgerlerge (1 132), meıirbıkelerge (1 181) tıesili. Genderlik turǵydan alǵanda, jumys izdeýshilerdiń belsendiligi shamalas deńgeıde qalyptasqan. Túıindemelerdiń 52,1%-yn áıelder, 47,9%-yn erler ornalastyrǵan. Áıelder kóbine bilim, densaýlyq, býhgalterııa salalarynda jumys izdese, er adamdar tehnıkalyq, basqarýshylyq baǵyttarǵa kóbirek qyzyǵýshylyq tanytypty.
Eskeretin jaıt, jastar barlyq jumys izdeýshilerdiń 40,8%-yn quraǵan. Onyń ishinde 24 jasqa deıingi jastar – 15,2%. 35-44 jas aralyǵyndaǵy azamattar – 29,9%, 45-54 jas sanaty – 19,1%, 55 jastan asqandardyń úlesi – 10,2%.
Jalaqy deńgeıi boıynsha bos jumys oryndary arasynda eń joǵary usynystar óndiris basshysy (shamamen 1,8 mln teńge), kenish dırektory (shamamen 1 mln teńge), ınjener-hımık (shamamen 1 mln teńge) laýazymdaryna qatysty tirkelgen. Jumys izdeýshiler tarapynan eń joǵary jalaqyny agronom-entomologter (shamamen 3,4 mln teńge), stıýardessalar (shamamen 3,3 mln teńge), kompıýterlik jabdyqty montajdaýshylar (shamamen 2,7 mln teńge) suraǵan.
Keıingi kezderi Elektrondyq eńbek bırjasynda bos jumys oryndary kóbeıip, jumys izdeýshiler asa belsendilik tanytpaǵan. Sarapshylar muny jyl aıryǵyna tán qubylys dep sanaıdy. Sebebi jumys berýshiler qysta kadr izdeýdi jalǵastyrsa, jumys izdeýshilerdiń kóbi jumysqa ornalasý josparyn jańa jyldyń basyna qaldyrady. Demek bul jaǵdaı maýsymdyq sıpatqa ıe. Qańtardan keıin jumys izdeýshilerdiń belsendiligi artyp, eńbek naryǵynda anaǵurlym teńgerimdi ahýal qalyptasýy múmkin.