Qazaqstan Respýblıkasynyń Prezıdenti N.Á.Nazarbaevtyń «Nur Otan» partııasynyń XVI sezinde jarııalaǵan bes ınstıtýttyq reformasyn jáne Qazaqstan qoǵamy men memleketti ári qaraı jańǵyrtýdy júzege asyrý maqsatynda Qazaqstan Respýblıkasynyń Syrtqy ister mınıstri Erlan Ydyrysovtyń tapsyrmasymen mınıstrliktiń Jańǵyrtý jónindegi arnaıy jumys toby quryldy.
Arnaıy jumys tobynyń negizgi maqsaty – memleketti jańǵyrtýǵa qajetti sheteldik tájirıbeni zertteý. Toptyń jumysyn jalpy úılestirý mınıstrdiń birinshi orynbasary Rápil Joshybaevqa júkteldi. Elbasy óz sózinde atap ótkendeı, qazirgi ýaqytta álemdegi ahýal kúrdelene túsýde. Álemdik naryqtarda qýat kózderi men metall baǵalarynyń quldyraýy ekonomıkalyq táýekelderdi kúrt ulǵaıtyp jiberdi. Barlyq derlik memleketter eleýli geosaıası jáne ekonomıkalyq syn-qaterlerdi bastan ótkerýde. «Nurly Jol» Jańa Ekonomıkalyq Saıasaty Qazaqstannyń ekonomıkalyq táýekelderge qoıar tosqaýyly boldy. Álemniń búkil elderi aldynda turǵan táýekelder men jahandyq syndardyń joǵary deńgeıin eskere otyryp, Qazaqstan Prezıdenti syrtqy faktorlardyń memleket qurylysyna yqpalynyń teris ssenarııine jol bermeý, damýdyń qol jetkizilgen qarqynyn saqtaý, álemniń 30 damyǵan memleketine qaraı ilgerileý boıynsha naqty tapsyrmalar júktedi. Memleket basshysy qoıǵan tapsyrmalardy júzege asyrý Syrtqy ister mınıstrligi qyzmetiniń basym baǵyttarynyń biri bolyp tabylady. Mınıstrlik shetelderdegi ókildikterine tıisti jumystardy ilgeriletý týraly tapsyrmalar berdi.
«Egemen-aqparat».