Májiliste Halyqaralyq ister, qorǵanys jáne qaýipsizdik komıtetiniń múshesi, Qazaqstan Respýblıkasy Prezıdenti janyndaǵy adam quqyqtary jónindegi komıssııa tóraǵasy, jýrnalıst, saıası ǵylymdar doktory, professor Qýanysh Sultanovtyń «Elbasy jáne Qazaq memlekettigi» kitabynyń tusaýkeser rásimi ótti, dep habarlady Májilistiń baspasóz qyzmeti.
Kitap Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń elimizdiń jańa dáýirdegi memleket qurylysy men onyń dúnıejúzilik qoǵamdastyqqa erkin aralasyp, básekege laıyqty toptan kóriný maqsatyndaǵy orasan memlekettik qaıratkerlik eńbegine arnalǵan.
Sharany Májilis Spıkeri Qabıbolla Jaqypov ashyp, júrgizdi. Alǵy sózinde Májilis Tóraǵasy Qýanysh Sultanovtyń ómirlik tájirıbesi mol daryndy saıasatker, qoǵamdaǵy bedeli zor memleket qaıratkeri retinde eline tanymal, halqyna syıly da ardaqty azamat ekenin aıta kelip, kitaptyń mazmunyna, árbir taraýyna jeke-jeke toqtalyp, baǵasyn bildirdi.
Odan keıin sóz alǵan Qazaqstan Respýblıkasynyń Memlekettik hatshysy Gúlshara Ábdihalyqova mereıtoı ıesine Elbasynyń Alǵys hatyn oqyp berip, omyraý belgisin taqty.
Senat Tóraǵasy Qasym-Jomart Toqaev Qýanysh Sultanulynyń el ıgiligi jolyndaǵy qajyrly eńbegin jan-jaqty baıandaı kelip, kitap mazmunyna aıryqsha nazar aýdardy. Qazaqstannyń aıtylǵan barlyq boljamdarǵa qaramastan, el Prezıdentiniń arqasynda turaqty ekonomıkalyq damý qarqynyna ıe, reformalardy tabysty júzege asyryp, aımaqtyq jáne jahandyq qaýipsizdikti nyǵaıtý isine eleýli úles qosyp kele jatqan, kúlli álem qaýymdastyǵy moıyndaǵan elge aınalǵanyn, bul eńbek el ómirindegi osyndaı aıryqsha kúrdeli oqıǵalardyń qundy jylnamasy ekenin aıtty.
– Bul kitap jańa memleket qurý jolynda barsha Qazaqstan halqynyń el Prezıdentimen birge jumyla otyryp jasaǵan aýqymdy eńbeginiń aıryqsha kórinisi ekenin atap ótý qajet, – deı kelip, Qasym-Jomart Toqaev Senatta atqarǵan eleýli eńbegi úshin Qurmet gramotasyn tabys etti.
Odan keıin «Nur Otan» partııasy Tóraǵasynyń birinshi orynbasary Baýyrjan Baıbekke sóz berilip, ol Qýanysh Sultanulynyń partııanyń bedelin kóterý jolyndaǵy eseli eńbegine toqtalyp, mereıtoı ıesine «Nur Otan» partııasynyń Májilistegi fraksııasynyń jetekshisi D. Nazarbaevanyń usynysymen, partııanyń Saıası Bıýro sheshimimen, Elbasynyń kelisimi boıynsha berilgen partııanyń eń joǵarǵy nagradasy «Altyn belgi» omyraý belgisin taqty.
Kitap tusaýkeserinde el Úkimetiniń atynan QR Premer-Mınıstriniń Keńse basshysy Erlan Qoshanov ystyq lebizin bildirip, Premer-Mınıstr Kárim Másimovtiń quttyqtaý hatyn tabys etti.
Shara barysynda Qýanysh Sultanulymen uzaq jyldardan beri áriptes ári zamandas bolǵan, partııada da, Senatta da birlese eńbek etken Parlament Senatynyń 1995-2000 jyldardaǵy Tóraǵasy, biraz jyldar Senat depýtaty bolǵan belgili memleket jáne qoǵam qaıratkeri О́mirbek Baıgeldi, «Elbasy jáne Qazaq memlekettigi» kitabynyń alǵysózin jazǵan, Memleket tarıhy ınstıtýtynyń dırektory, professor Búrkitbaı Aıaǵan, Qýanysh Sultanuly túlegi sanalatyn Ál-Farabı atyndaǵy Qazaq ulttyq ýnıversıtetiniń rektory, professor Ǵalymqaıyr Mutanov sóz sóıledi. Ǵ.Mutanov atalǵan ýnıversıtettiń bastamasymen shyǵarylyp kele jatqan, 45-shi shyǵarylymy tolyǵymen Qýanysh Sultanovtyń ómiri men eńbegine arnalǵan «О́negeli ómir» kitabyn tanystyrdy.
Rásim sońynda Qýanysh Sultanov sharaǵa qatysqan barsha azamattarǵa Elbasynyń eńbegi týraly derekti kitapqa qyzyǵýshylyq bildirip, salıqaly oı, salmaqty sóz aıtqandary úshin alǵysyn bildirdi.
Sharaǵa sondaı-aq, qos palata depýtattary, tanymal saıası jáne qoǵam qaıratkerleri, joǵary oqý oryndarynyń, buqaralyq aqparat quraldarynyń ókilderi qatysty.
Osyǵan deıin Qýanysh Sultanovtyń elimizdiń qoǵamdyq-saıası ómirine arnalǵan 10 kitaby men 200-den astam maqalasy jaryqqa shyqqan bolatyn.