Keshe Úkimet otyrysynda Abaı oblysynyń ákimi Berik Ýálı óńirdegi týrızm salasynyń damýy jáne Alakóldegi ahýal týraly baıandady, dep jazady Egemen.kz.
Ákimniń sózinshe, oblysta týrıstik ınfraqurylymdy damytý baǵytynda aýqymdy jobalardy júzege asyrý josparlanyp otyr. Alakól jaǵalaýyn damytýǵa ótken jyly 1 mlrd teńge baǵyttalǵan. Qabanbaı aýylynda qutqarý stansııasynyń qurylysy aıaqtaldy. Kól jaǵalaýynda abattandyrý, kóshelerdi jóndeý jumystary júrgizildi. Bıyl Alakól demalys aımaǵyn damytý úshin jergilikti bıýdjetten 2,4 mlrd teńge qarajat bólindi. Kól jaǵalaýynda abattandyrý, kóshelerdi jóndeý jumystary júrgiziledi. Shomylý maýsymyna deıin jasandy ıntellekt tehnologııasyn engize otyryp, 117 zamanaýı beınebaqylaý júıesi, 6 antenna-dińgek qurylǵysy ornatylyp, mobıldi ınternet baılanys jelisimen tolyq qamtylady.
«Byltyr kúzde bas josparǵa ózgerister engizý jumystary bastaldy, bıylǵy qyrkúıek aıynda aıaqtalady. Nátıjesinde aýmaǵy 300 gektardan 3 000 gektarǵa deıin jetedi. Týrıstik aımaqqa kúndelikti kelýshiler sanyn 20 myńnan 75 myń adamǵa jetkizý kózdelip otyr. Týrısterdiń qaýipsizdigin qamtamasyz etý maqsatynda Qabanbaı aýylynda órt sóndirý deposynyń qurylysy júrgizilýde», dedi óńir basshysy.
Onyń aıtýynsha, jyl saıyn kól jaǵalaýy qysqaryp, týrızm nysandaryna qaýip tóndirip otyr. Osyǵan baılanysty qaýipti 360 metr jaǵalaý anyqtalyp, ótken jyly kúzde nyǵaıtý jumystary atqaryldy. Sonyń arqasynda 300 oryndyq 3 demalys ornyn sý basý qaýpi seıildi. Barlyq jaǵalaýdy nyǵaıtýǵa osy jyldyń qańtar aıynda jalpy quny 15,2 mlrd teńgege jobalaý-smetalyq qujattamasy ázirlendi.
Kelesi ózekti másele – elektr qýatynyń jetispeýi jáne elektr jelileriniń tozýy. Bul máseleni sheshý úshin magıstraldy elektr jelisimen transformatorlyq qosalqy stansııa qurylysynyń jobalaý smetalyq qujattamasy ázirlenip, memlekettik saraptamadan ótip jatyr. Bıylǵy shomylý maýsymyna elektr jelileriniń jáne ishki qosalqy stansııalardy jóndeý jáne kútip-ustaý úshin 275 mln teńge qarjy qarastyrylady. Týrıstik aımaqqa qatty turmystyq qaldyqtar polıgonyn salýǵa jobalaý-smetalyq qujattama ázirlenip jatyr. Sý, kárizdik jeliler, blok-modýldi tazartý qurylǵysyn salýǵa jobalaý-smetalyq qujattama ázirleýge qarajat bólindi.
Týrızmdi jarnamalaý toqyrap tur: Sheteldikterdi tartý quraldary nege 4 jyl boıy jańartylmaǵan?
Ákimdiktiń dereginshe, 2025 jyly oblystyń týrızm salasynda 8,9 mlrd teńgege 4 joba iske qosyldy. Onyń qatarynda «Týǵan jerge týyńdy tik» ınvestısııalyq forýmy aıasynda Semeı qalasynda 6,5 mlrd teńgege «Pana Unique Semey» bes juldyzdy qonaq úı − meıramhana kesheni salynyp, byltyr Jańa jyl qarsańynda paıdalanýǵa berildi. Nátıjesinde 107 jańa jumys orny quryldy. Besqaraǵaı aýdany Staraıa Krepost aýmaǵynda 1 mlrd teńgege balyq sharýashylyǵymen qatar qyzmet kórsetetin keshendi demalys bazasy iske qosyldy. Jol boıyndaǵy servısti damytý maqsatynda ótken jyly «Semeı-Pavlodar» tasjolynyń boıynda «Petro Retail» JShS jańa Keruen Inn qonaq úıin ashty.
Týrızm túıtkilderi: Sózden iske kóshetin kez keldi
2029 jylǵa deıin oblysta 87,4 mlrd teńgege 48 jobany iske asyrý josparlanǵan. Olardyń ishinde iri jobalardyń biri – Ázerbaıjan Respýblıkasy ınvestorlarynyń qatysýymen «Alakól» emdeý-saýyqtyrý keshenin salý. Búginge qurylys ornyn bekitý jumystary kelisilip jatyr. Sonymen qatar, Shıpaly kólinde balshyqpen emdeıtin sanatorııdi salý kózdelip otyr. Eskızdik jobasy ázirlendi, sáýir aıynda qurylys jumystaryn bastaıdy. Semeı qalasynda «Semey Mall» mádenı oıyn-saýyq saýda ortalyǵy salynady. Sondaı-aq, «Abay Hospitality Group» JShS jáne «PanaComplexSemey» JShS Abaı aýdanynyń Jıdebaı aýmaǵynda etnokeshendi, vızıt-ortalyǵyn, «Tary» kafesin salýdy josparlanyp otyr.