Ortalyq kommýnıkasııalar qyzmetinde Aýyl sharýashylyǵy mınıstri Asyljan Mamytbekov baspasóz máslıhatyn ótkizdi. Oǵan vedomostvonyń birqatar sala basshylary da qatysty.
Baspasóz máslıhatynda «AО́K qoldaý boıynsha memlekettik sharalar» degen taqyryp aıasynda áńgime órbidi. Qazirgi tańda aýyl sharýashylyǵy salasynda atqarylyp jatqan jumystar men týyndaǵan máseleler jóninde aıtqan mınıstr, sońǵy jyldary qol jetken tabystardy da atap ótti. «О́tken jyly shetelden Qazaqstanǵa ımporttalatyn aýylsharýashylyq taýarlarynyń kólemi azaıdy. Naqtylasaq, azyq-túlik ımporty alys shetelderden 6,2, al Eýrazııalyq ekonomıkalyq odaq elderinen keletin taýarlar 10 paıyzǵa tómendedi. Importty almastyrý baǵytynda jaqsy damý bar. Máselen, et ımporty 42,3 paıyzǵa, jumyrtqa úsh, kartop eki, qııar 4,8 esege kemidi. Esesine eksportymyz ósip keledi. Byltyr alǵash ret et jáne et ónimderiniń 12 myń tonnasyn eksporttadyq. Onyń 7 myń tonnasy sıyr eti. Sondaı-aq, óńdelgen et ónimderiniń eksporty da ósýde. Shujyq jáne et konservileriniń eksporty 9 jáne 2 esege deıin artty. Shetelge sútti jetkizý kólemi de alty esege kóbeıdi. Reseı men Qazaqstan valıýta baǵamdarynyń aıyrmashylyǵyna qaramastan, mundaı jaǵymdy ahýal bıyl da saqtalyp otyr. Jyldyń eki aıynda 620 tonna taýyq eti eksporttaldy. Byltyr onyń kólemi 141 tonna bolatyn. Byltyr syr men irimshik eksporty bolmaǵan edi, bıyl ol 316 tonnany qurady. Bul, 2013 jyly qabyldanǵan «Agrobıznes-2020» baǵdarlamasynyń alǵashqy nátıjeleri», dedi A.Mamytbekov.
Qazaqstan jaqyn ýaqyttary aýyl sharýashylyǵy salasynda shetel ınvestorlaryn tartý arqyly 15 ınnovasııalyq jobany qolǵa almaq. «Búgingi kúnde, qosylǵan qundy qamtamasyz etetin sala retinde qaıta óńdeý ónerkásibin damytý bekitildi. Osyǵan oraı, Elbasy bergen tapsyrmany oryndaý maqsatynda sheteldik iri ınvestorlardyń qatysýymen 15 joba ázirlenip jatyr. Bular tikeleı sheteldik kompanııalar qatysatyn jobalar. Olardyń quny shamamen 190 mlrd. teńge. Etti qaıta óńdeý jáne etti mal sharýashylyǵynda 4 joba, 60 mlrd. teńgeden astam qarajatqa 3 qus fabrıkasyn salý josparlanyp otyr. Bul bizge ımportty 50 paıyzǵa tómendetýge múmkindik beredi. Sondaı-aq, sút óndirý jáne qaıta óńdeý, maı ónimderin óndirý jáne dándi daqyldardy tereń qaıta óńdeý boıynsha birqatar joba josparlandy. Munymen birge, maıly daqyldardy qaıta óńdeý boıynsha 3 zaýyt salý kózdelýde. Mysaly, «EýrazııaAgroHoldıng» JShS-da múıiz, teri, tuıaq sekildi qaldyqtardy qaıta óńdeý jelisin qosa alǵanda, jylyna 17 myń tonna etti qaıta óńdeý qýaty bar keshen salynady. Egin sharýashylyǵyndaǵy paıdalanylmaı jatqan jerlerdi ártaraptandyrý nátıjesinde maıly daqyldardyń aýmaǵy artyp keledi. О́tken jyly maıly daqyldardyń aýmaǵy 2 mln. gektardan asty. Sondyqtan, maıly daqyldardy qaıta óńdep, ony saýdaǵa shyǵarýdy damytý kerek», dedi mınıstr. Vedomostvo basshysynyń sózin Reseıdiń «Efko» kompanııalar tobynyń ókili Qaırat Nurpeıisov jalǵady. «Efko» kompanııalar toby maıdy qaıta óńdeý salasyndaǵy iri kompanııalardyń biri. Atalǵan salada jıyrma jyldyq tájirıbesi bar kompanııanyń Reseı boıynsha 4 maı zaýyty, 2 termınaly, 1 mln. tonna ónim saqtaý qabiletine ıe elevatory bar. Qazaqstannyń ońtústik jáne soltústik oblystarynda árqaısysynyń 330 myń tonna qýaty bar 2 maı zaýytyn, 50 myń tonna saqtaý qýaty bar 2 elevator jáne ár oblysta 4 daıyndaý servısin salýdy josparlap otyrmyz. Jobalarymyz salanyń damýyna úlken ekpin beredi dep senemiz», dedi ol. Reseıdiń «Molochnye ıstorıı» JShS dırektory Nurlan Sanǵalın de jaǵymdy jańalyǵymen bólisti. «Kompanııa eki jyl buryn Aqtóbe oblysynda quramyna bordaqylaý alańdary, reprodýktor, qurama jem zaýyty, etti qaıta óńdeý kesheni kiretin et klasteriniń qurylysyna kirisken bolatyn. Et kombınaty tolyq sıkldy bolady, ıaǵnı qaldyqsyz óńdeledi. Et kombınatynyń qurylysy osy jyly bastaldy. Buıyrtsa, aldaǵy qarasha aıynda aıaqtalady dep josparlanyp otyr. Klasterge salynǵan ınvestısııalardyń jalpy quny 10,8 mlrd. teńge. Shamamen 1 500 jumys orny ashylady», dedi dırektor.
Nurbaı ELMURATOV, «Egemen Qazaqstan».