«Qazaqstan zańgerler odaǵy» respýblıkalyq qoǵamdyq birlestiginiń tóraǵasy Serik Aqylbaı Konstıtýsııalyq komıssııanyń besinshi otyrysynda Ata zańǵa engizýge usynylǵan ózgeristerdiń kólemi men tereńdigi qoldanystaǵy qujatqa túzetý ǵana emes, shyn máninde jańa Konstıtýsııany qabyldaý týraly sóz qozǵaýǵa múmkindik beredi degen pikir bildirdi, dep habarlaıdy Egemen.kz.
Serik Aqylbaıdyń aıtýynsha, túzetýlerdiń bul jobasy konstıtýsııalyq qurylystyń irgeli negizderin qozǵaıtyn normalardyń aıtarlyqtaı jıyntyǵynan turady.
Atap aıtqanda, jańa ınstıtýsıonaldyq arhıtektýra qalyptasýda: bir palataly Parlament, Halyq keńesi, Úkimet qyzmetiniń, sot júıesi men quqyq qorǵaý tetikteriniń jańartylǵan modelderi.
Konstıtýsııalyq komıssııa: Qazaqstan aýmaǵynyń tutastyǵy týraly norma ózgerissiz qalady
«Usynystardyń aýqymy men tereńdigin saralaı kele qoldanystaǵy Konstıtýsııanyń jańa redaksııasy týraly emes, shyn máninde jańa Ata zań týraly aıtqan jón dep sanaımyn», dedi Serik Aqylbaı.
Onyń aıtýynsha, búginde memleket pen qoǵamnyń basqarý tıimdiligine, quqyq aıqyndylyǵy men adam quqyqtaryn qorǵaýǵa qoıatyn talaby joǵary. Osyǵan baılanysty respýblıkada bılikti uıymdastyrý negizderi ózgerip, jańa ınstıtýttar qalanyp keledi. Osylaısha, biz Qazaqstannyń konstıtýsııalyq damýynyń sapaly jańa kezeńi týraly aıtyp otyrmyz.
Elimizde arnaıy Konstıtýsııalyq komıssııa qurylatyn boldy
Sonymen qatar ol jańa Konstıtýsııa memlekettiliktiń negizgi qundylyqtarynyń tolyq sabaqtastyǵyn jáne jınaqtalǵan quqyq qoldaný tájirıbesin eskere otyryp, olardyń dáıekti damýyn qamtamasyz etetinin atap ótti.
Sondaı-aq Serik Aqylbaı Konstıtýsııada dindi memleketten bólýdi tikeleı bekitý boıynsha jıyntyq jobaǵa nátıjesinde engen usynysyn eske saldy.
«Qazaqstan aýmaǵyndaǵy dinı uıymdardyń qyzmeti zańǵa sáıkes júzege asyrylatynyn jáne konstıtýsııalyq qurylystyń negizderin qorǵaý, ulttyq qaýipsizdikti qamtamasyz etý, qoǵamdyq tártipti, adamnyń quqyqtary men bostandyqtaryn, halyqtyń densaýlyǵyn, qoǵamnyń rýhanı-adamgershilik qundylyqtaryn qorǵaý maqsatynda shektelýi múmkindigin qosymsha bekitý qajet dep sanaımyn. Mundaı tolyqtyrýlar ıdeıanyń túpki mánin ashady», dedi ol.
Sonymen birge ol advokatýranyń mártebesine qatysty normany qosymsha pysyqtaýdyń mańyzyn atap ótti.
Memleket basshysy Konstıtýsııalyq komıssııanyń tóraǵasyn qabyldady
«Tujyrymdamalar barynsha salmaqty jáne azamattardyń quqyqtary men bostandyqtaryn qamtamasyz etý mindetterine tolyq sáıkes kelýi úshin áli de jumys jasaý kerek», dedi Serik Aqylbaı.
Jalpy, ol Komıssııa durys baǵytta jumys atqaryp jatyr degen pikir bildirdi.