Elimizdiń erler quramasynyń kapıtany bolyp Dıas Dosqaraev taǵaıyndaldy. 6–7 aqpan aralyǵynda Astanada Monakoǵa qarsy ótetin Devıs kýboginiń pleı-off saıysynda dál osy maman bizdiń jigitterge jetekshilik etedi.
Dıas Dosqaraev kezinde jaqsy oıynshy boldy. Týǵan aǵasy Oljas ekeýi ǵasyrlar toǵysynda túrli jarystarda atoı saldy. Aǵaıyndylar birqatar elishilik, halyqaralyq dodada daralandy. Oljas – qazaq tennısshileri arasynan shyqqan tuńǵysh sport sheberi. Alaıda ol bilim-ilimniń jolyna túsip, AQSh-qa attandy da, úlken sportpen qosh aıtysty. Sóıtip, sporttyq mansabyn erte aıaqtady. Dıas ta Amerıkadaǵy Ońtústik Alabama ýnıversıtetinde oqydy. Degenmen tennısten qol úzbedi. Kezinde Ispanııada, áıgili Emılıo Sanches Akademııasynda sheberligin shyńdaǵan Dosqaraev elimizdiń ekinshi raketkasy dárejesine deıin jetti. Sol kezderi «Egemen Qazaqstan» gazetinde halyqaralyq jarystarda eleýli tabystarǵa qol jetkizip júrgen jalǵyz qazaq tennısshisi jaıynda qulash-qulash maqalalardyń jaryq kórgeni kóziqaraqty oqyrmandardyń esinde bolar.
Kortpen qosh aıtysqannan keıin de Dıas Baýyrjanuly úlken sporttan alystaǵan joq. Federasııada birqatar basshylyq qyzmet atqardy. 2012–2019 jyldar aralyǵynda ulttyq quramanyń kapıtany boldy. Sol kezderi jerlesterimiz úsh ret Devıs kýboginiń shırek fınalynda oınady. 2019 jyly jańa formattaǵy jarystyń fınalyna shyqty. Odan keıin uıymnyń vıse-prezıdenti boldy. Bul rette de D.Dosqaraev biraz sharýa tyndyryp, únemi ıgi isterdiń basy-qasynan tabyldy. Endi, mine, respýblıkalyq tennıs federasııasynyń prezıdenti Bolat О́temuratov qazaq mamanynyń iskerligi men bilimdarlyǵyn, talapshyldyǵy men tabandylyǵyn, óz isine degen adaldyǵy men uıymdastyrýshylyq qabiletin eskerip, oǵan dúbirli doda qarsańynda asa jaýapty mindet júktedi. Bul mindetti Dıastyń abyroımen atqaratynyna senim mol.