Ynta zor

Bıylǵy kóktemdegi Qaraǵandy aımaǵynda buryn-sońdy bolyp kórmegen sý tasqynynyń zardaby 35 eldi mekendi qıyndyqqa ushyratsa, sonyń ishinde ásirese, Buqar jyraý aýdanyndaǵy Ǵabıden Mustafın atyndaǵy 2 myńǵa tarta otbasy bar kent turǵyndaryna da aýyr tıdi. 12 sáýirde tosynnan lap qoıǵan sel kósheler men aýlalardy kólkigen sýǵa toltyrǵan bolatyn. Birqatar úılerdi aǵyn shaıyp áketti. Dereý qutqarý sharalaryn qoldaný arqasynda adamdar qaýipsiz jerge kóshirilip, aman qaldy. Olar jaqyn mańdaǵy Temirtaý men Aqtaýda bosatylǵan jataqhanalarǵa, týǵan-týysqandary úılerine ornalastyryldy. Jan-jaqtan jedel kómekke kelýshiler azyq-túlikpen, kıimmen, tósek oryndarmen qamtamasyz etip, qıyndyqty jeńildetti. Bul kúnde jer aıaǵy keńisimen tabıǵat apaty saldaryn joıý jumys­tary keń kólemde júrgizilip jatyr. Oblyspen qatar basqa óńirlerden de mustafındikterge qamqorlyq jasaýshylar kóp. Aldymen qolǵa alynǵan sharalardyń biri tasqyn ekpininen opyrylyp, meken etýge jaramsyz bolyp qalǵan úıler ornyna jańalaryn salýǵa jumyldyrylyp otyr. Oblys boıynsha anyqtalǵan avarııalyq jaǵdaıdaǵy úılerdiń 359-ynyń 272-si osy atalǵan kent esebine enýi, al onyń 198-i buzylýyna baılanysty istiń keshiktirilmeýi turǵyndar tileýinen shyqty. Kentti qalpyna keltirý jumys­­­tarymen birge mamyrdyń alǵash­qy kún­derinen-aq jańa qo­nys­­tar­dyń irgetasy qalana bas­tal­dy. Bul is-sharaǵa aımaq basshy­sy Nur­mu­hambet Ábdibekov qatysyp, kúz­ge deıin birneshe baspana paı­dala­ný­ǵa be­rile­tindigi týraly sózin jer­gi­likti jurt rızashylyqpen qa­byl aldy. «Bizdiń osyndaı qıyn shaq­ta memleket pen halyq tarapy­nan der kezinde kórsetilip jatqan kómek-qoldaýǵa alǵysymyz sheksiz. Jaz qansha aıtqanmen jaıly maýsym ǵoı. Eń bastysy eldiń kóńil-peıili ýaqytsha qınalysymyzdy jeńildeteri sózsiz. Búginde birlese qımyldaýshy qury­lys uıymdarynyń táýlik boıǵy eńbeginiń sharapaty tez tıerine senemiz, – deıdi bolashaq qonystarynyń qabyrǵasy kóterilýine qýanyshty Nurlan Jabaev pen Iýlııa Malysheva otbasylary. Olar ǵana emes, basqalardyń da al­daǵy qyrkúıek aıynda jańa úılerge qonys aýdarýǵa múmkindikteri bar. Aldyn ala esepteýler boıynsha kentte turǵyn úı qurylysyn salý úshin ǵana 3,5 mlrd. teńge qarjy qajet. Bul máseleniń sheshimi tabylyp keledi. Osynda qurylys jumystaryn júrgizýshi merdiger uıymdardyń biri – «Jolqurylysy» JShS proraby Vladımır Vednıskııdiń aıtýynsha, mindetti atqarýǵa kúsh te, tehnıka da jetkilikti. Qurylysshylardyń kómekke degen yntasy zor. Aıqyn NESIPBAI, «Egemen Qazaqstan». Qaraǵandy oblysy.