Elimizdiń jańa Konstıtýsııasy jobasyna azamattar men sarapshylar qaýymdastyǵynyń usynystary negizinde birqatar mańyzdy tolyqtyrý engizildi. Olardy Konstıtýsııalyq reforma jónindegi komıssııanyń onynshy otyrysynda Konstıtýsııalyq Sot tóraǵasynyń orynbasary Baqyt Nurmuhanov, tanystyrdy. Usynystardyń ishinde volonterlik qyzmetti konstıtýsııalyq deńgeıde bekitý bastamasy qoldaý tapty, dep jazady Egemen.kz.
Komıssııa otyrysynda aıtylǵandaı, volonterlik qyzmettiń qoǵam damýy men qorshaǵan ortany qorǵaýdaǵy róli artyp keledi. Osyny eskere otyryp, qoldanystaǵy «Volonterlik qyzmet týraly» zańmen sabaqtastyq saqtala otyryp, Ata Zańǵa tıisti norma engizý jón dep tanylǵan.
«31-baptyń 2-tarmaǵynda elimizde erikti áleýmettik saqtandyrý, áleýmettik qamsyzdandyrýdyń ózge de nysandaryn qurý, volonterlik qyzmet jáne qaıyrymdylyqtyń yntalandyrylatyny jóninde tolyqtyrý engizildi», dedi Baqyt Nurmuhanov.
Onyń aıtýynsha, bul bastama jańa Konstıtýsııa jobasynyń ózge de erejelerimen úılesedi. Atap aıtqanda, Preambýla men memlekettiń túbegeıli qaǵıdattarynda kórinis tabatyn jaýapty ári jasampaz patrıotızm ıdeıalaryn ilgeriletýge, eńbekqorlyq qundylyqtaryn bekitýge serpin beredi.
Qazaqstan bastamasy: Jahandyq eriktiler jyly
Sonymen birge otyrysta Quryltaı qyzmetin uıymdastyrýǵa qatysty ózgerister de qozǵaldy. Baqyt Nurmuhanov Konstıtýsııa jobasynyń 59-babynyń 3-tarmaǵyn alyp tastaý usynysyn ortaǵa saldy. Bul tarmaqta komıtetter men komıssııalardyń qurylý tártibi, ókilettikteri men qyzmetin uıymdastyrýdy zańmen aıqyndaý kózdelgen edi.
Eriktiler – el men eńbekke adal jandar
Onyń aıtýynsha, bul máseleler qazirdiń ózinde «Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýsııalyq zańmen, «QR Parlamentiniń komıtetteri men komıssııalary týraly» zańmen jáne Parlament reglamentterimen rettelip otyr.
«Bul túzetý atalǵan Konstıtýsııalyq zańda osy máselelerdi qamtýǵa jáne olardy quqyqtyq retteý deńgeıin arttyrýǵa múmkindik beredi», dep atap ótti ol.
Komıssııa otyrysynda Konstıtýsııa jobasynyń memlekettik jáne orys tilderindegi mátinderin jetildirý jumystary jalǵasyp jatqany da aıtyldy. Baqyt Nurmuhanovtyń málimdeýinshe, jumys toby quqyqtyq normalardyń mazmunyn barynsha qoljetimdi ári túsinikti etý úshin tujyrymdardy ońtaılandyrýǵa basymdyq berip otyr. Bul baǵytta termınologııalyq jáne semantıkalyq birizdilikke erekshe mán berilip otyr.
Volonterlik qaýymdastyq jańa Konstıtýsııa jobasyn qoldaıtynyn málimdedi
Atap aıtqanda, Úkimet, Parlament, Prezıdent Ákimshiligi, Konstıtýsııalyq komıssııanyń redaksııalyq-termınologııalyq jumys toby, sondaı-aq Qazaq tili halyqaralyq qoǵamy mamandary men tartylǵan lıngvısterdiń usynystary negizinde jekelegen redaksııalyq jáne stılıstıkalyq túzetýler engizilgen.