Prezıdent Qasym-Jomart Toqaev tóraǵalyq etken Úkimettiń keńeıtilgen otyrysynda Premer-mınıstr Oljas Bektenov memlekettiń barlyq áleýmettik mindettemeleri tolyq kólemde oryndalyp jatqanyn málimdedi. Sonymen qatar ataýly áleýmettik kómek pen ózge de áleýmettik tólemderdi taǵaıyndaýdaǵy júıesizdik pen baqylaýdyń álsizdigi bıýdjet shyǵyndarynyń negizsiz ósýine áser etkeni aıtyldy, dep jazady Egemen.kz.
Úkimet basshysynyń sózinshe, áleýmettik tólem túrleriniń shamadan tys kóp bolýy, birizdi júıeniń joqtyǵy jáne tıimdi qadaǵalaý tetikteriniń álsizdigi qarjynyń tıimsiz jumsalýyna, jekelegen jaǵdaılarda jymqyrylýyna jol bergen. Alaıda sońǵy jyldary qabyldanǵan sharalar naqty nátıje kórsetti.
«Atqarylǵan jumystardyń arqasynda sońǵy eki jyldyń ózinde shamamen 288 mlrd teńgeniń tıimsiz ıgerilýine tosqaýyl qoıyldy. Sizdiń Turkistan gazetine bergen suhbatyńyzda jáne Ulttyq quryltaıdyń besinshi otyrysynda aıtylǵandaı, búkil sala reformalaýdy qajet etedi. Osy oraıda áleýmettik kómek túrlerin biriktirý jáne birizdi júıege keltirý prosesi júrgizilýde. Bilim berý qyzmetteri sıfrlandyrylyp jatyr, bul nysandardy salýdan bastap jan basyna sáıkes qarjylandyrýǵa deıingi barlyq kezeńdi qamtıdy. Sondaı-aq áleýmettik medısınalyq saqtandyrý qorynyń qyzmeti Qarjy mınıstrliginiń aqparattyq júıelerimen ıntegrasııalaý arqyly qaıta qaralýda», dedi Oljas Bektenov.
Áleýmettik kómek alýshylardy tekserý kúsheıedi
El múddesine saı jańa kóshi-qon saıasaty
Áleýmettik saıasattaǵy tásilderdi qaıta qaraý kóshi-qon salasyna da áser etken. Otyrysta kóshi-qon zańnamasyndaǵy jáne ımmıgranttardyń jekelegen sanattaryn áleýmettik qoldaý tetikterindegi olqylyqtar masyldyq pıǵyldyń qalyptasýyna yqpal etkeni atap ótildi. Osyǵan baılanysty bıyldan bastap jeńildikter men qoldaý baǵdarlamalary iriktelip, olar tek jumys kúshi tapshy óńirlerge qonys aýdaratyn azamattarǵa ǵana beriletin boldy.
Áleýmettik kómek maıshelpek emes
Premer-mınıstr memlekettik saıasattyń negizgi áleýmettik salalardaǵy transformasııasy bıýdjettik tártipti kúsheıtýge múmkindik beretinin jetkizdi. Bilim berý, densaýlyq saqtaý, áleýmettik qorǵaý, mádenıet jáne sport baǵyttaryna jyl saıyn shamamen 18 trln teńge bólinedi.
«Bul ózgerister memlekettik bıýdjetten qomaqty qarjy bólinetin salalarda tártip ornatýǵa múmkindik beredi. Úkimet «shynaıy muqtaj adamdarǵa ǵana kómek» qaǵıdatyn qatań ustanady», dedi Oljas Bektenov.