Shymkent qalasynyń ákimi Ǵabıt Syzdyqbekov áleýmettik mańyzdy eki nysannyń qurylys aýmaǵynda kapsýla salý rásimine qatysty. Onyń biri – paralımpıadalyq jáne sýrdlımpıadalyq sport kesheni bolsa, ekinshisi – 200 orynǵa arnalǵan №2 qalalyq perınataldyq ortalyq.
Shahar basshysynyń aıtýynsha, jańa sport kesheni múmkindigi shekteýli jandarǵa jattyǵý jasaýǵa qolaıly jaǵdaı týǵyzyp, megapolıste salamatty ómir saltyn ornyqtyrýǵa septigin tıgizedi. Bul – Shymkenttiń atyn halyqaralyq dodalarda tanytyp júrgen sportshylardyń sheberligin shyńdaýǵa mol múmkindik. Ákim atalǵan jobalar Prezıdent Qasym-Jomart Toqaevtyń ınklıýzıvti sportty damytý jáne sportpen shuǵyldanýǵa jaıly orta qalyptastyrý jónindegi tapsyrmalaryn oryndaý aıasynda júzege asyrylyp jatqanyn jetkizdi.
Qalanyń jańa shaǵyn aýdandarynyń birinde boı kóteretin nysanda fýtbol alańy, ámbebap sport zaldary, júzý basseıni, avtoturaq qarastyrylǵan. Munda azamattar jekpe-jek, bı, ústel oıyndary, armrestlıng, paýerlıftıng sııaqty sport túrlerimen aınalysa alady. Sondaı-aq keshen aýmaǵy vorkaýt aımaǵymen, júgirý, velosıped jolaqtarymen qamtylmaqshy.
Qalalyq deneshynyqtyrý jáne sport basqarmasy basshysynyń ýaqytsha mindetin atqarýshy Qanat Joldyqaraevtyń málimdeýinshe, jańa keshende arbamen bıleýge, ústel tennısin oınaýǵa tolyq jaǵdaı jasalady. Nysan halyqaralyq standarttarǵa saı salynatyndyqtan, bolashaqta elimizdiń túrli týrnırlerin, Azııa chempıonattaryn osynda ótkizý josparlanyp otyr. Búginde múmkindigi shekteýli jandar qaladaǵy beıimdelgen sport keshenderinde jattyǵyp júrgenimen, olarǵa arnaıy mamandandyrylǵan ortalyq aýadaı qajet edi.
Jańa keshenniń salynatynyna ásirese sportshylar qýanyshty. Solardyń biri – Tokıoda ótken sýrdlımpıada oıyndarynyń erkin kúresten chempıony Pernesh Shadııar. Jasóspirimder men jastar arasyndaǵy álem birinshiliginiń kúmis júldegeri sportpen 2012 jyldan beri aınalysady. Alǵashqy bapkeri Ǵalymjan Omar ony 6-synyptan bastap jattyqtyrǵan.
– Qazirde sport zaldary qalanyń ár buryshynda ornalasqan. Máselen, kúres zaly bir jerde bolsa, basseınge barý úshin qalanyń ekinshi shetine qatynaýǵa týra keledi. Al jańa ǵımarat barlyq jattyǵý zalyn biriktirgen biryńǵaı keshen bolǵaly tur. Nysannyń tezirek paıdalanýǵa berilýin asyǵa kútemiz, – deıdi sportshy.
Pernesh qazir estý qabileti nashar balalarǵa sabaq beredi. Jattyqtyrýshylyq qyzmetpen qatar, el kýbogy, Azııa, álem chempıonattaryna qyzý daıyndalyp júr. Basty maqsaty – 2029 jyly Grekııada ótetin sýrdlımpıada oıyndarynyń júldegeri ataný.
Irgetasy qalanǵan ekinshi nysan – perınataldyq ortalyq qurylysy da Memleket basshysynyń tapsyrmasymen qolǵa alynǵan. Prezıdent Úkimetke ana men balany qorǵaý júıesin nyǵaıtýdy mindettegen bolatyn. Demografııalyq ósimi joǵary megapolısti zamanaýı perzenthanamen qamtamasyz etý maqsatynda jobaǵa memleket tarapynan arnaıy qarjy bólingen.
Qalalyq densaýlyq saqtaý basqarmasy basshysynyń orynbasary mindetin atqarýshy Inna Glazebnaıanyń aıtýynsha, 200 tósek-orynǵa shaqtalǵan medısınalyq ortalyq ozyq úlgidegi qurylǵylarmen, zerthanamen jabdyqtalady. Qurylys kelesi jyldyń sońynda aıaqtalyp, el ıgiligine beriledi dep josparlanyp otyr. Sondaı-aq jańa jumys oryndary ashylady. Mamannyń sózine súıensek, qazir shaharda aýmaqtyq bólinis boıynsha 4 perzenthana qyzmet kórsetedi. Onyń ishinde №1 perınataldyq ortalyq túrli patologııasy bar júkti áıelderdi qabyldaıdy. Al qurylysy bastalǵan jańa nysan «№2 qalalyq perınataldyq ortalyq» atanyp, negizinen aýyr patologııalyq jaǵdaıdaǵy analar men salmaǵy 500 gramnan bastap shala týǵan sábılerdi kútýge mashyqtanady. Bul óz kezeginde qaladaǵy ózge perzenthanalarǵa túsetin júktemeni edáýir azaıtady.
ShYMKENT