Túrkistan qalasynda ótetin Túrki memleketteri uıymynyń (OTG) beıresmı sammıti barysynda qaýipsizdik pen jedel áreket etý qyzmetteri úshin jańa býyn tehnıkalar paıdalanylmaq. Is-shara kezinde mobıldi komandalyq jáne jedel áreket etý mindetterin atqarý úshin Tesla Cybertruck bazasyndaǵy kólikter tartylady, dep jazady Egemen.kz.
Sammıt aıasynda qoldanylatyn eki elektropıkaptyń biri Memlekettik kúzet qyzmetiniń (MQQ) basqarý jáne kúshterdi úılestirý júıesine berilse, ekinshisi Tótenshe jaǵdaılar mınıstrliginiń (TJM) jedel rezervinde tur.
Túrki memleketteri uıymy sammıti kezinde alǵash ret Tesla Cybertruck mobıldi shtabtyq kólik retinde qoldanylady.
Memlekettik kúzet qyzmeti bul kólikti alǵash ret joǵary deńgeıdegi is-sharalarda mobıldi komandalyq-shtabtyq mashına retinde paıdalanyp otyr. Onyń negizgi mindeti – bólimshelerdi úılestirý, turaqty baılanys ornatý jáne jappaı sharalar kezinde jedel sheshim qabyldaýdy qamtamasyz etý.
Qaýipsizdik organdary úshin bul kóliktiń birqatar artyqshylyqtary erekshe atap ótildi. Atap aıtqanda, joǵary mobıldilik, jol talǵamaıtyn múmkindigi jáne dybyssyz qozǵalysy ony qala ishinde de, kúrdeli tabıǵı aımaqtarda da tıimdi paıdalanýǵa múmkindik beredi.
Kólik drondardy qýattandyrýǵa, qorǵalǵan baılanys júıelerine, esepteý tehnıkasyna jáne radıoelektrondyq quraldarǵa energııa jetkizýge qabiletti.
Tótenshe jaǵdaılar mınıstrligi úshin Tesla Cybertruck-tiń taǵy bir baǵyty – qutqarý operasııalary. Elektropıkap Almaty mańyndaǵy taýly aımaqtarda izdestirý-qutqarý jumystarynda qoldanylyp keledi. Bul óńirlerde jyl saıyn týrıster men alpınısterdiń kóptep kelýine baılanysty jedel áreket etý qajettiligi joǵary.
Almatyda kózge túsken Tesla kóligi TJM-ge tıesili me?
Sammıt kezinde kólik jedel rezervte turyp, qajet bolǵan jaǵdaıda izdestirý jáne qutqarý operasııalaryna tartylýy múmkin.
Qutqarý kesheni spýtnıktik ınternetpen, jylý kamerasy bar kásibı kvadrokopterlermen, qorǵalǵan baılanys quraldarymen jáne avtonomdy qýat kózderimen jabdyqtalǵan. Bul júıe tótenshe jaǵdaı aımaǵynda qutqarýshylar men medısına qyzmetin jedel úılestirýge múmkindik beredi.
TJM úshin mańyzdy faktor – elektr platformasynyń tabıǵı qoryq aımaqtarynda da qoldanýǵa qolaıly bolýy. Bul ishten janý qozǵaltqyshy bar kólikterge qoıylatyn shekteýler jaǵdaıynda ekologııalyq júktemeni arttyrmaı, mobıldilikti saqtaýǵa múmkindik beredi.
Mamandardyń aıtýynsha, Tesla Cybertruck sııaqty tehnologııalar memlekettik qyzmetterdiń jumysynda sıfrlyq jáne ınnovasııalyq sheshimderdiń úlesi artyp kele jatqanyn kórsetedi.
Qaýipsizdik baǵytynda Memlekettik kúzet qyzmeti jedel úılestirý men turaqty baılanysty kúsheıtýge basymdyq berse, TJM kúrdeli taýly aýmaqtarda adamdardyń ómirin saqtap qalýǵa arnalǵan jańa tehnologııalardy engizýdi jalǵastyryp otyr.
Tesla robottary qashan satylymǵa shyǵady?