Pavlodar oblysy kómir generasııasyn damytýǵa baǵyttalǵan ulttyq jobany júzege asyrýda mańyzdy strategııalyq rólge ıe. О́tken jyldyń qorytyndysy boıynsha óńir Qazaqstanda óndirilgen elektr energııasynyń 42%-yn qamtamasyz etti, dep habarlaıdy Egemen.kz.
Elimizdiń energetıkalyq qaýipsizdigin kúsheıtýdegi negizgi qadamdardyń biri – Ekibastuz GRES-2 stansııasyn keńeıtý. Joba aıasynda stansııanyń qýaty 1 GVt-tan 2,1 GVt-qa deıin ulǵaıtylady. Budan bólek, «taza kómir» tehnologııalaryn paıdalaný arqyly qýaty 2,64 GVt bolatyn jańa Ekibastuz GRES-3 stansııasyn salý jáne Aqsý GRES-in jańǵyrtý josparlanyp otyr.
Ekibastuz GRES-2: qýattylyǵy eki ese artady
Elektr energııasy óndirisiniń artýy kómir óndirý kólemin de kóbeıtýdi talap etedi. Bul rette eldegi kómir óndirisiniń 38%-yn qamtamasyz etetin «Bogatyr Kómir» JShS sheshýshi ról atqarady. Teńgerimdik qory 2,4 mlrd tonnany quraıtyn kompanııa óndiristi kezeń-kezeńimen arttyrýdy kózdeıdi: 2024 jylǵy 42,7 mln tonnadan 2026 jyly 45,2 mln tonnaǵa deıin, al 2032 jylǵa qaraı jylyna 56,5 mln tonnaǵa jetkizý josparlanǵan.
Osy mindetterdi júzege asyrý úshin 2026-2032 jyldarǵa arnalǵan 360 mlrd teńgelik ınvestısııalyq baǵdarlama ázirlengen. Qarjynyń basym bóligi kúrdeli qurylysqa, «Severnyı» qımasynda joǵary tıimdi sıkldik-aǵyndyq tehnologııany engizýge jáne jańa úıindilerdi jaraqtandyrýǵa baǵyttalady. Sonymen qatar, taý-ken kólik tehnıkasyn jańartý, qoldanystaǵy nysandardy qaıta jańǵyrtý jáne kúrdeli jóndeý jumystary júrgiziledi. Bul sharalar eldiń energetıkalyq suranysyn turaqty qamtamasyz etýge múmkindik beredi.
Pavlodar: energetıka qýaty artyp keledi