QOSTANAI. 25 aqpan. Qostanaı oblysy Qarabalyq aýdanynyń ákimi Almat Ysmaǵulov bastaǵan delegasııa kórshi Chelıabi oblysynyń Ývelka aýdany (Reseı) basshylyǵynyń shaqyrýymen baryp keldi. Bul týraly ainanews.kz habarlady.
Shekaralyq yntymaqtastyq sheńberinde Qarabalyq aýdany basshylyǵyn, kásipkerlerin jáne aýyl sharýashylyǵy taýarlaryn óndirýshilerdi Ývelka aýdanynyń basshysy Anatolıı Lıtovchenko kórshiler arasynda bıznes-áriptestikti damytý maqsatynda shaqyrǵan bolatyn. Ývelkalyqtar qonaqtarǵa aýdan ákimshiliginen bastap, ónerkásibin, damý josparlaryn, jetistikteri men mádenı muralaryn kórsetti. Qarabalyq delegasııasy «Resýrs» jarma óńdeıtin iri zaýytta boldy. Bul zaýyt Qarabalyq aýdanyndaǵy «Ak-Bıdaı-Agro» jaýapkershiligi shekteýli seriktestiginiń qyzyǵýshylyǵyn týdyrdy. Olar ósirgen qaraqumyqty osy zaýytqa jiberýge tolyq múmkindik baryna kóz jetkizdi. Bul kásiporyndaǵy sapa standartyn engizý qarabalyqtyq kásipker Vladımır Krıgerdiń de nazaryn aýdardy.
Al Ývelka mýnısıpalıtetti aýdanynyń basshylyǵy men kásipkerlerin Qarabalyq aýdany ústinen ótetin, Qytaı, Reseı, Qazaqstandy baılanystyratyn «Almaty-Ekaterınbýrg» tas jolynyń boıyndaǵy kólik-logıstıkalyq kesheni qyzyqtyrdy. Kórshiler qonaqtarǵa «Knıajıı sokolnık» taýarly sút fermasy men sút óńdeý zaýytyn da kórsetti. Sonymen qatar, olar Qarabalyq aýdanynyń Reseıge et shyǵarý jaǵyn da surastyrdy. Delegasııa Ývelka aýdanynyń birneshe áleýmettik nysandarynda da boldy. Qatar jatqan aýdandar bolǵanymen, bir-birinen úırenetin de, úıretetin de tustar bar ekendigine kórshilerdiń kózi jete tústi. Bul damý úshin kerektigin Ývelka ózeniniń eki jaǵyndaǵy jurt ta jaqsy biledi.
Názıra Járimbetova.
Derek, sýret: ainanews.kz.