Astanadaǵy L.N.Gýmılev atyndaǵy Eýrazııa ulttyq ýnıversıteti alańynda Qazaqstan Respýblıkasynyń jańa Konstıtýsııasyna arnalǵan saraptamalyq tyńdalym ótti. Referendýmǵa shyǵarylǵan Ata zań jobasyn jan-jaqty talqylaǵan jıynǵa Májilis depýtattary, akademııalyq qaýymdastyq ókilderi men jetekshi zańger-ǵalymdar qatysty, dep jazady Egemen.kz.
Is-shara barysynda usynylǵan Konstıtýsııanyń negizgi erejeleri, tujyrymdamalyq ózegi men ınstıtýsıonaldyq jańashyldyqtary keńinen sóz boldy. Sarapshylar jańa Ata zań azamattardyń qaýipsizdigi men quqyqtaryn qorǵaýǵa basymdyq beretinin, halyq pen bılik arasyndaǵy ózara senimdi nyǵaıtýǵa baǵyttalǵanyn atap ótti. Qujat el birligi men tynyshtyǵyn, jer tutastyǵyn jáne adam quqyqtaryn saqtaýdyń mańyzdy kepili retinde baǵalandy.
Qazaqstanda jańa Konstıtýsııanyń jobasy jarııalandy
Saraptamalyq tyńdalymǵa Parlament Májilisiniń depýtaty Nıkıta Shatalov, Prezıdentiniń janyndaǵy QSZI dırektorynyń orynbasary Alýa Joldybalına, Fılosofııa, saıasattaný jáne dintaný ınstıtýtynyń dırektory Aıgúl Sádýaqasova, Memleket tarıhy ınstıtýty dırektorynyń orynbasary Erkebulan Jumashev, zań ǵylymdarynyń doktory, qaýymdastyrylǵan professor, zań fakýltetiniń dekany Baýyrjan Smatlaev qatysty.
Dóńgelek ústelge ýnıversıtettiń basqarma múshesi, sapany qamtamasyz etý jáne ishki baqylaý jónindegi prorektor Indıra Rystına moderatorlyq etti. Onyń aıtýynsha, Qazaqstan úshin bul kezeń tarıhı mańyzǵa ıe.
«Búgin BAQ betterinde referendýmǵa shyǵarylǵan jańa Konstıtýsııa – el bolashaǵyn aıqyndaıtyn qujat. Ata zańnyń alǵashqy babynda memlekettiń eń qymbat qazynasy adam jáne onyń ómiri, quqyqtary men bostandyqtary ekeni aıqyn jazylǵan. Sondyqtan Konstıtýsııalyq reformaǵa qoǵam beıjaı qaraǵan joq. Ulttyq quryltaıda Memleket basshysy túbegeıli ózgerister engiziletinin jarııalap, saıası jańǵyrýdyń jańa kezeńin bastady. Usynylyp otyrǵan jańa Konstıtýsııada ǵylym men bilimge, mádenıet pen ınnovasııaǵa aıryqsha mán berilgen», dedi prorektor.
Jıynda memlekettik bıliktiń konstıtýsııalyq negizderin nyǵaıtý, bılik tarmaqtary arasyndaǵy tepe-teńdikti saqtaý, basqarý júıesin jetildirý, quqyq ústemdigin kúsheıtý jáne demokratııalyq ınstıtýttardy damytý máseleleri talqylandy. Adam quqyqtary men azamattyq jaýapkershilikke qatysty normalar da nazarda boldy.
Ata zań jobasy maquldanǵan jaǵdaıda Parlament ókilettigi qashan toqtatylady?
Májilis depýtaty Nıkıta Shatalov Konstıtýsııalyq reformanyń uzaq ýaqyt boıy keń qoǵamdyq talqylaýdan ótkenin atap ótti. Onyń aıtýynsha, azamattar, sarapshylar, saıası partııalar men qoǵamdyq uıymdar óz usynystaryn erkin bildirip, olardyń barlyǵy Konstıtýsııalyq komıssııa deńgeıinde qarastyrylǵan.
«Jańa Ata zańnyń basty erekshelikteriniń biri – ashyqtyq qaǵıdatyna negizdelýi. Qoǵamdyq talqylaýlar barysynda azamattardyń usynystary eskerildi. Bul memleket pen qoǵam arasyndaǵy senimdi kúsheıtetin mańyzdy qadam. Sondyqtan jańa Konstıtýsııa – ádiletti, ashyq jáne halyq únine qulaq asatyn memleket qurýǵa baǵyttalǵan tarıhı qujat», dedi depýtat.
Saraptamalyq baıandamalar, pikir almasý jáne suraq-jaýap formatynda ótken jıynda jańa Konstıtýsııa tek quqyqtyq qujat qana emes, bilimdi, ınnovasııany jáne synı oılaýdy baǵalaıtyn jańa qoǵamdyq kelisimniń negizi retinde baǵalandy.
«Jańa Konstıtýsııany Egemen Qazaqstan gazetinde muqııat oqyp shyqtym. Konstıtýsııalyq komıssııa múshesi retinde halyq usynǵan pikirlerdiń jańa zańda kórinis tapqany qýantady. Bul – demokratııalyq órleýdiń naqty belgisi», dedi Aıgúl Sádýaqasova.
Vıse-Prezıdentti kim taǵaıyndaıdy?
Osylaısha, EUÝ-de ótken saraptamalyq tyńdalym jańa Konstıtýsııa jobasyn qoǵamdyq deńgeıde qoldap-qýattaýdyń aıqyn kórinisine aınaldy.