Abaı ýnıverıstetinde aqyn, jýrnalıst, etnograf, Qazaqstannyń eńbek sińirgen qaıratkeri Qasymhan Begmanovtyń «Kóktemge hat» atty jyr keshi ótti, dep habarlaıdy Egemen.kz.
«Adal azamat» jobasy aıasynda ótken kezdesýde qalamger jastarmen suhbattasyp, poezııa álemi jaıynda syr terbedi.
Qasymhan Begmanov – jyr men tarıhty, sezim men zerdeni sabaqtastyra bilgen qalamger. Jarty ǵasyrǵa jýyq ýaqyt boıy ádebıet pen jýrnalıstıka salasynda ónimdi eńbek etip, ult murasyn túgendeýge, rýhanı qundylyqtardy dáripteýge súbeli úles qosty.
Aqynnyń syrshyl poezııasyn bul keshte jas qaýym erekshe yqylaspen qabyldady. Mahabbat, sezim týraly shýmaqtar keshtiń shyraıyn kirgizdi.
Poezııa keshinde ýnıversıtettiń ónerli jastary kópshilikke keńinen tanymal «Ol kóktem oralmaıdy», «Baqyttymyn ózińmen» ánderin shyrdy. Orazaly Dosbosynov atyndaǵy jas aqyndar ortalyǵynyń músheleri aqynǵa jyr joldaryn tebirenispen arnady. Shaba Ádenqulqyzy aqynnyń «Armanym ediń», «Meniń de daýysym estiler» ánderin naqyshyna keltire oryndasa, jas ánshi Jaqsybek Qalelbek «Men súıgen qyzdar» ánin áýeletti. Al Aqsuńqar Aqynbabaqyzynyń oryndaýyndaǵy «Toǵyspaǵan taǵdyrym» áni kórermen júregine názik muń syılap, zal ishi únsiz tolǵanysqa bólendi.
Án men jyr qatar órbigen áserli keshten stýdentter kóp saýalǵa jaýap alyp, rýhanııat, ádebıetke qatysty áńgimelerge qanyq boldy. Júrek túkpirindegi názik sezimderdi qozǵaǵan bul júzdesý júrekterge jylý, kóńilge shýaq syılaǵan taǵylymdy basqosý boldy.
Elimizge tanymal ǵalymdar, aqyn-jazýshylar men jýrnalıster rýhanı keshtiń qadirmendi qonaǵy boldy.