Elordada elimizdiń jetekshi qoǵamdyq-saıası kúshteri «Ádiletti jáne progressıvti Qazaqstannyń halyqtyq Konstıtýsııasy úshin!» atty Jalpyulttyq koalısııaǵa birikti. Onyń quramyna bes jetekshi saıası partııanyń ókilderi men mıllıondaǵan azamattyń múddesin bildiretin 300-den asa qoǵamdyq uıym endi.
Otyrysqa qatysýshylar jańa Konstıtýsııa jobasy saıası júıe arhıtektýrasyn qoǵamnyń jańa suranysyna saı túbegeıli qaıta jańǵyrtatynyn atap ótti. Bul bıliktiń barlyq tarmaǵynyń turaqty jumysyn qamtamasyz etedi.
Májilis spıkeri, Jalpyulttyq koalısııa jetekshisi Erlan Qoshanov atap ótkendeı, jańa Konstıtýsııa – shyn máninde tarıhı qujat. Onda eń aldymen, adamǵa basymdyq berilip, memlekettiń basty baılyǵy jer qoınaýyndaǵy resýrstar emes, bilimdi jas urpaq ekeni aıqyndaldy. Bul – Prezıdent qolǵa alǵan aýqymdy ózgeristerdiń altyn arqaýy. Endi ol eń joǵary konstıtýsııalyq deńgeıde bekitilip jatyr.
«Qazaqstannyń jańa Konstıtýsııasy – osy irgeli reformalardyń shyrqaý shyńy. Bul – Prezıdentimizdiń jyldar boıǵy oı-tolǵamdarynyń jemisi. Halyqtyń muń-muqtajy, talap-tilegi men úmit-senimi ushtasqan tarıhı qujat. Sondyqtan jańa Konstıtýsııa halyqpen birge jazylǵan – naǵyz halyqtyq Konstıtýsııa deýge tolyq negiz bar. Biz keler urpaqqa ár azamat maqtan tutatyn, órkendegen, Ádiletti Qazaqstandy qaldyrýymyz kerek. Bárimizdi biriktiretin – osy asqaq arman. Sol armanǵa – ádiletti ári progressıvti Qazaqstanǵa Prezıdentimizben birge jeteıik», dedi E.Qoshanov.
О́z sózinde Memlekettik keńesshi Erlan Qarın jańa Konstıtýsııanyń mańyzyna toqtaldy.
«Qazaqstan bolashaqta azamattary bilimdi, ǵylymdy meńgergen, ınnovasııaǵa arqa súıegen, tehnologııasy damyǵan elderdiń qatarynda bolýǵa umtylatynyn baıqatty. Sondyqtan bul – eldiń órkendeýine jańa serpin beretin Konstıtýsııa», dedi ol.
Sondaı-aq shara barysynda «Aýyl» partııasynyń tóraǵasy Serik Egizbaev, «Aq jol» Qazaqstan Demokratııalyq partııasynyń tóraǵasy Azat Perýashev, «Respublica» partııasynyń tóraǵasy Aıdarbek Qojanazarov, Májilistegi Qazaqstan Halyq partııasy fraksııasynyń jetekshisi Magerram Magerramov, Májilis depýtattary, «Amanat» partııasy fraksııasynyń músheleri Erlan Saırov, Únzıla Shapaq, Sergeı Ponomarev sóz sóıledi.
Sonymen qatar «AgromashHoldıngKZ» AQ prezıdenti Dınara Shúkijanova, Respýblıkalyq advokattar alqasynyń tóraǵasy Mádı Myrzaǵaraev, saıasattanýshy Marat Shıbutov, «Qazaq tili» halyqaralyq qoǵamynyń prezıdenti Raýan Kenjehanuly oıyn ortaǵa saldy.
Kezdesýge qatysýshylar jańa Konstıtýsııa jobasy memlekettiń saıası júıesin odan ári jańǵyrtýǵa, áleýmettik kepildikterdi nyǵaıtýǵa, kásipkerlikti qoldaýǵa, ǵylymdy, mádenıetti jáne ulttyq qundylyqtardy damytýǵa baǵyttalǵan strategııalyq baǵdarǵa tolyq sáıkes keletinin atap ótti.
Sonymen qatar memleket ınstıtýsıonaldyq ózgerister jolynda mańyzdy kezeńnen ótkeni atalyp ótti. «Kúshti Prezıdent – yqpaldy Parlament – esep beretin Úkimet» formýlasy nyǵaıýda, Konstıtýsııalyq sot jumys isteýde, zańsyz shyǵarylǵan aktıvter memleketke qaıtarylýda, ulttyq resýrstardy ádil bólý qaǵıdaty kúsheıtilýde. Bul barlyq sheshim ádildik, teńdik jáne bolashaq urpaq aldyndaǵy jaýapkershilik qundylyqtaryna negizdeldi.
Jańa Negizgi zań qoǵamdaǵy tereń ózgerister men dúnıetanymy jańarǵan, memleketke joǵary talap qoıatyn jańa býynnyń qalyptasýyna jaýap retinde qabyldanǵany atalyp ótti. Osy úmitterdiń ózeginde adaldyqqa, zań ústemdigine, adamnyń qadir-qasıetine degen qurmetke jáne adam quqyǵyna kepildik berýge degen suranys jatyr. Jańa Konstıtýsııa osy qoǵamdyq talaptarǵa aıqyn ári naqty jaýap beredi.
Sondaı-aq Negizgi zań jobasy qoǵammen ashyq ári aýqymdy dıalog aıasynda ázirlengeni aıtyldy. Konstıtýsııalyq komıssııa jumysy jarııa túrde, tikeleı efırde jáne turaqty keri baılanys ornata otyryp júrgizildi. Osy ýaqyt aralyǵynda azamattardan, sarapshylardan, kásibı qaýymdastyqtardan jáne túrli sala ókilderinen 10 myń usynys pen ótinish kelip tústi. Olardyń árqaısysy qujatty ázirleý barysynda qaralyp, eskerilip otyrdy.
Sóz sóılegen barsha azamat osy sheshýshi kezeńde jańa Konstıtýsııany qabyldaýdyń tarıhı mańyzyn qalyń jurtshylyq arasynda ilgeriletý úshin qoǵamdaǵy jetekshi kúshterdi biriktirýdiń mańyzyn atap ótti.
Koalısııa quramyna saıası partııalardyń ortalyq jáne óńirlik qurylymdary, respýblıkalyq qoǵamdyq birlestikter, Parlament jáne máslıhat depýtattary, ǵylymı jáne sarapshylyq qaýymdastyq ókilderi, mádenıet jáne sport qaıratkerleri, kásipodaq uıymdary, salalyq qaýymdastyqtar men jastar birlestikteri kirdi.
Jýyrda Koalısııa músheleri óńirlerde túsindirý jumysyn bastaıdy. Aldaǵy referendým qarsańynda ashyq dıalog pen azamattardyń sanaly túrde qatysýyn qamtamasyz etý maqsatynda eńbek ujymdarymen, sarapshylar qaýymymen jáne turǵyndarmen kezdesý ótkizý josparlanyp otyr. Sonyń ishinde shalǵaı eldi mekender de nazardan tys qalmaıdy. Sebebi árbir azamattyń daýysy asa mańyzdy.