Elimizdiń arnaıy jasaq sarbazdary álemdik arenada el mereıin ústem etti. Dýbaı qalasynda ótken UAE SWAT Challenge-2026 halyqaralyq týrnırinde Qazaqstan quramalary úzdik nátıje kórsetip, júldeli oryndardan kórindi, dep jazady Egemen.kz.
7-11 aqpan kúnderi Birikken Arab Ámirlikterinde jetinshi márte uıymdastyrylǵan bul saıys beıresmı túrde «Arnaıy jasaq olımpıadasy» atalyp ketken. Bıylǵy dodaǵa álemniń 48 elinen 109 komanda qatysyp, kásibı daıarlyqtyń eń joǵary deńgeıin synǵa saldy. Qazaqstan atynan Memlekettik kúzet qyzmeti, Ulttyq qaýipsizdik komıteti jáne Ishki ister mınıstrliginiń arnaıy maqsattaǵy bólimshelerinen quralǵan bes qurama óner kórsetti.
Jalpy qorytyndy boıynsha «Kazakhstan C» komandasy altyn júldeni ıelendi. Al «Kazakhstan A» quramasy kúmis júldege qol jetkizdi. Budan bólek, taǵy úsh otandyq komanda úzdik 20 quramanyń qataryna enip, el qorjynyn toltyrdy. Bul nátıje otandyq arnaıy jasaqtyń júıeli daıyndyǵy men kásibı deńgeıin aıqyn ańǵartty.
Otanshyldyqtyń ólshemi
Saıys barysynda qatysýshylar taktıkalyq operasııalar júrgizý, ǵımarat pen munarany basyp alý, kepilge alynǵandar men ofıserlerdi qutqarý, sondaı-aq kúrdeli kedergiler jolaǵynan ótý sekildi bes arnaıy tapsyrmany oryndady. Jaýyngerler barlyq kezeńde shapshańdyq, tózimdilik jáne komandalyq úılesimniń joǵary úlgisin kórsetti.
Halyqaralyq kórermenderdiń erekshe nazaryn «Tomiris» qyzdar quramasy aýdardy. Qurama týrnırdiń ár kezeńinde áıelder komandalary arasynda úzdik atanyp, jalpy esepte birqatar erler komandalaryn da artta qaldyrdy. Bul áıel jaýyngerlerdiń de álemdik deńgeıde básekege qabiletti ekenin kórsetti.
Qazaqstannyń arnaıy jasaǵy UAE SWAT Challenge-2026 týrnıriniń jeńimpazy atandy
Elimiz arnaıy maqsattaǵy bólimsheleri buǵan deıin de osy týrnırde júldeli oryndarmen oralǵan. Bıylǵy tabys sol turaqty jetistiktiń zańdy jalǵasy sanalady.
Jeńispen oralǵan sarbazdarǵa Prezıdent Qasym-Jomart Toqaev quttyqtaý joldap, jaýyngerlerdiń joǵary daıarlyǵyn, tabandylyǵy men otansúıgish rýhyn atap ótti.
UAE SWAT Challenge: Qazaqstan arnaıy jasaqtary týrnırdiń alǵashqy kúninde top jardy
12 aqpanda jeńimpazdar men týrnırge qatysýshylardy Astana qalasyndaǵy halyqaralyq áýejaıda saltanatty túrde qarsy alý rásimi ótti. El namysyn qorǵap, álemdik dodada top jarǵan arnaıy jasaq sarbazdaryn áriptesteri, qyzmet basshylyǵy, jaqyndary men jankúıerler zor qoshemetpen kútip aldy.