AQSh prezıdenti Donald Tramp 2009 jyly qabyldanǵan jáne eldegi federaldyq klımattyq talaptardyń quqyqtyq negizi bolyp kelgen sheshimniń kúshin joıǵanyn málimdedi. Atalǵan qujat avtokólik quraldarynyń parnıktik gaz shyǵaryndylaryna qoıylatyn standarttar men elektr kólikterin qoldaýǵa baǵyttalǵan normalardyń tiregi sanalǵan, dep habarlaıdy Egemen.kz.
Málimdeme Aq úıde jasaldy. Donald Tramp pen AQSh Qorshaǵan ortany qorǵaý agenttiginiń basshysy Lı Zeldın bul qadamdy «AQSh tarıhyndaǵy eń iri deregýlıasııalyq shara» dep atady.
Elimizde agroklımattyq polıgon qurylady
Tramptyń aıtýynsha, 2009 jylǵy «Parnıktik gazdardyń qaýip tóndiretini týraly qorytyndy» dep atalatyn qujat burynǵy prezıdent Barak Obama ákimshiligi tusynda qabyldanyp, amerıkalyq avtokólik ónerkásibine zııan keltirip, tutynýshylar úshin baǵanyń ósýine áser etken.
«Biz Obama dáýirindegi apatty saıasattyń kúshin resmı túrde toqtatamyz», dedi ol baspasóz máslıhatynda.
Atalǵan qorytyndyda 6 túrli parnıktik gaz halyq densaýlyǵyna qaýip tóndiredi dep tanylǵan. Sonyń negizinde kólik quraldarynyń shyǵaryndylaryna shekteý qoıý, sondaı-aq qazba otynmen jumys isteıtin kompanııalardy óz shyǵaryndylary jóninde esep berýge mindetteý tárizdi normalar engizilgen bolatyn.
Klımat máselesi kún tártibinde tur
Tramp bul qujattyń ǵylymı ári quqyqtyq negizi bolmaǵanyn alǵa tartty. Onyń sózinshe, qazba otyndary urpaqtar boıy mıllıondaǵan adamnyń ómirin saqtap, mıllıardtaǵan adamdy kedeılikten shyǵardy.
Al Barak Obama H áleýmettik jelisindegi paraqshasynda atalǵan sheshimniń kúshin joıý qorshaǵan orta men halyq densaýlyǵyna keri áser etýi múmkin ekenin jazdy. Onyń pikirinshe, 2009 jylǵy qorytyndy avtokólik shyǵaryndylary men elektr stansalaryna qoıylǵan shekteýlerdiń negizi bolǵan.
«Onsyz biz az qorǵalǵan, densaýlyǵy álsiz jáne klımattyń ózgerýimen kúresýge qaýqarsyz bolamyz», dep málimdedi ol.
Sarapshylardyń pikirinshe, bul sheshim AQSh-tyń klımattyq saıasatyna eleýli ózgeris ákelip, energııa naryǵy men avtokólik óndirisine yqpal etýi yqtımal.
Klımattyq ózgeriske – baıypty kózqaras