ATYRAÝ. 25 aqpan. Atyraý oblysyndaǵy áriptesterimen tyǵyz baılanys jasaý úshin Reseıdegi Omby oblysynyń kásipkerleri keldi. Bul týraly egemen.kz tilshisi habarlady.
Budan bylaı saýda-ekonomıkalyq, ǵylymı-tehnıkalyq jáne ózge de salalardaǵy qarym-qatynasty nyǵaıtýdy kózdegen atyraýlyq jáne ombylyq kásipkerler ózara kelisim aıasynda bir-birimen jıi kezdesýge ýaǵdalasty. «Biz Atyraýǵa birinshi ret kelip turmyz. Bul óńirdiń ekonomıkasyn damytýda munaı-gaz ónerkásibine basym baǵyt beriledi. Kásipkerlerdiń isi Ombyda da, Atyraýda da bir-birimen óte uqsas. Bizdiń bul saparymyzda Atyraýǵa Omby oblysyndaǵy 9 kompanııanyń ókili keldi. Ásirese, «Gazpromneft-ONPZ», «Tıtan» sekildi kásiporyndardyń Atyraýdaǵy áriptesterimen baılanysy nyǵaıǵanyn qalaımyz. Biz atyraýlyq kásipkerlermen ózge de salalarda qarym-qatynasymyzdy keńeıtkimiz keledi. Bul sapar eki el kásipkerleri úshin paıdaly ári jemisti bolaryna senemin», dedi Omby oblystyq saýda-ónerkásip palatasynyń vıse-prezıdenti Andreı Tıtov.
Ombylyq kásipkerlerdiń Atyraýǵa sapary munaı-gaz ónerkásibi salasynda kásibin dóńgeletken shaǵyn jáne orta bıznes ókilderimen kezdesýden bastaldy. Atyraý oblysy kásipkerler palatasynyń basshylyǵy óńirdi órkendetý jónindegi áleýmettik-ekonomıkalyq kórsetkishtermen tanystyrdy. Reseı kásipkerleri «AtMО́Z», «Embimunaıgaz» jáne «Raýan Nalko» sekildi munaı-gaz ónerkásibi salasyndaǵy irgeli kásiporyndardy aralap, olardyń búgingi tynys-tirshiligimen jumysymen keńinen tanysýǵa múmkindik aldy.
«Bizdiń jumysymyzdyń basym baǵytynyń biri – Eýroazııalyq ekonomıkalyq odaq aıasynda shekaralas óńirler arasyndaǵy baılanysty keńeıtý. Ombylyq kásiporyndar ónimi men jumysy bizdiń kásipkerlerimizdi qyzyqtyrady. Sol sebepten budan bylaıǵy ýaqytta eki oblystyń kásipkerleri bir-birimen tyǵyz baılanys jasap, ózara tıimdi kelisimder jasaıdy dep oılaımyn», dedi Atyraý oblystyq kásipkerler palatasynyń dırektory Asylbek Jákıev.
Joldasbek Shópeǵul.
Derek, sýret: Atyraý oblystyq kásipkerler palatasy.