«Qyzyljar» arnaıy ekonomıkalyq aımaǵynda ornalasqan túriktiń «Nord Panels» kompanııasy bıyl naýryz aıynan bastap aǵash qaldyqtaryn tereń óńdeý jolymen ártúrli kólemdegi júkterge arnalǵan aǵashqap jasaýdy qolǵa almaq. Kompanııa jańa jaraqtardy satyp alý maqsatynda «Soltústik ÁÁQ» AQ-dan 670 mln teńge qaryz alǵan.
«Biz «Qyzyljar» arnaıy ekonomıkalyq aımaqqa 2021 jyldan bastap kirdik. Búginge deıin faneralar shyǵaryp keldik. Aǵashty tereń óńdeýdiń klasterin qurdyq. Arnaıy ekonomıkalyq aımaqtyń aýmaǵynan 5 gektardaı jer satyp aldyq. Qazir aýmaǵy 30 sharshy metrdi alyp jatqan zamanaýı zaýytymyz jumys istep tur. Onyń qýaty jylyna 50 myń tekshe metrge teń fanera shyǵarýǵa jetedi. О́nimniń túri san alýan. Onyń ishinde qurylys, kólik jáne jıhaz jasaýǵa qoldanylatyndary bar», deıdi kásiporynnyń atqarýshy dırektory Aıvaz Bakırov.
Joǵaryda aıtqanymyzdaı endi kásiporyn qaldyqtardan aǵashqaptar qurastyrýdy qolǵa alyp otyr. Mundaıdy damyǵan elder baıaǵydan shyǵarady eken. Qaldyqtan qurastyrylatyn bolǵandyqtan tara retinde qoldanylatyn aǵashqaptardyń ózindi quny tómen. Aǵashqaptar termııalyq óńdeýden ótkendikten olardan fıtosanıtarlyq sertıfıkat talap etilmeıdi. Iаǵnı, qosymsha shyǵynǵa jol berilmeıdi. Sondyqtan eksporterler óz júkterin mundaı qapqa salýǵa qýana kelisedi.
Aǵashqaptyń tómengi bóligi myń tonnadaı salmaqty kótere alady, bul onyń beriktigin aıǵaqtaıdy.
«Biz Qazaqstanda birinshi bolyp osyndaı óndirispen aınalysýdy qolǵa alyp otyrmyz. «Soltústik ÁÁQ» bizdiń bastamamyzdy qoldap, qaryzdy eki aıdyń ishinde rásimdep berdi. Bul óte jyldam ýaqyt dep sanaımyz. Aqshany aýdarǵan boıda Qytaıdan alǵashqy jaraqtar kelip, qazir qurastyrý jumystary qyzý júrip jatyr. Josparymyz boıynsha jylyna 1 mln dana aǵashqap óndirýdi belgilep otyrmyz. Ony Qazaqstannyń barlyq aımaǵyna shyǵaramyz. Sonymen qatar alys-jaqyn shetelderge de shyǵarý oıymyzda bar. Osy jańa óndiristiń arqasynda kásipornymyzda qosymsha 30 jańa jumys orny ashylady», deıdi A.Bakırov.
Aıta ketetin jaıt, «Soltústik ÁÁQ» AQ bıyl oblys aýmaǵynda osymen tórtinshi ınnovasııalyq jobany qarjylandyryp otyr. Osyǵan deıin ÁÁQ Petropavl qalasynda jylyjaı turǵyzý men sańyraýqulaq egetin fermany qurýdy qarjylandyrǵan edi. Buǵan qosa Aıyrtaý aýdanynda qurǵaq qymyz óndiretin zaýytty qarjylandyrǵan. Sonymen birge Qyzyljar aýdanynda jońyshqadan jemazyq daıyndaıtyn zaýytqa da qarjy bólgen.
Soltústik Qazaqstan oblysy