«Astana – Praga» baǵytyndaǵy ushaqta áıel adamnyń densaýlyq jaǵdaıy kenetten kúrt nasharlap, esinen tanyp qalǵan. Abyroı bolǵanda, reıstegi jolaýshylardyń biri, ekibastuzdyq dáriger Anar Kúrkebaıqyzy der kezinde naýqastyń ómirine arasha túsken.
– Ushaq áýejaıdan kóterilgen soń, arada bir saǵattaı ýaqyt ótkende jolaýshynyń birine medısınalyq kómek qajet ekeni týraly habarlandy. Muny estip, birden naýqastyń janyna bardym. Jasy shamamen elýlerdegi áıel sulq túsip, esinen tanǵan. Qan qysymy tómendep ketken. Shuǵyl túrde alǵashqy medısınalyq kómek kórsetip, aıaqtaryn joǵary kótertkizdim. Qajetti em-dom jasaǵan soń naýqas esin jııa bastady. Aıtýynsha, eshbir medısınalyq esepte turmaǵan, mundaı jaǵdaıǵa birinshi ret kezigip otyr. Naýqastyń jaıyn bir saǵattaı qadaǵalap otyrdym. Aqyrynda aman-esen kelip qondyq, – deıdi dáriger.
Áýejaıda naýqas áıel ózin jaqsy sezinetinin aıtyp, jedel járdem kómeginen bas tartqan. Mundaı jaǵdaı Anar Kúrkebaıqyzynyń dárigerlik tájirıbesinde alǵash ret kezdesken. Aq jeleńdi abzal jan buǵan deıin klınıkalyq ólimge tap bolǵan adamdy qutqaryp qalǵanyn aıtady. Ekibastuz medısınalyq kolledjiniń, Semeı medısınalyq ýnıversıtetiniń túlegi búginde Ekibastuz qalasyndaǵy №3 emhanada jalpy tájirıbe dárigeri bolyp jumys isteıdi. Ýchaskesindegi 1,5 myńǵa jýyq adamnyń densaýlyǵyna jaýapty. Chehııa eline, Praga qalasyna gastroenterologııa baǵytyndaǵy bilimin jetildirý maqsatynda issaparmen barypty.
Pavlodar oblysy