Qazir jer-jerde jańa Konstıtýsııa jobasyn jurtshylyq arasynda túsindirý jalǵasyp jatyr. Qyzylordadaǵy «Aray City Mall» saýda ortalyǵynda «Aq jol» demokratııalyq partııasynyń oblystyq fılıaly ókilderi «Ádiletti jáne progressıvti Qazaqstannyń halyqtyq konstıtýsııasy úshin» jalpyulttyq koalısııasynyń úgit-nasıhaty aıasynda kásipkerlermen kezdesti.
Partııanyń oblystyq máslıhattaǵy fraksııasynyń jetekshisi, belgili kásipker Qaırat Boranbaev usynylyp otyrǵan ózgerister memlekettik basqarý júıesin jańǵyrtýǵa, bılik tarmaqtary arasyndaǵy tepe-teńdikti kúsheıtýge baǵyttalǵanyn atap ótti. Sonymen qatar jańa jobada azamattardyń quqyqtary men bostandyqtaryn qorǵaý tetikteri naqtylana túskenin aıtty.
Spıker sózinde Konstıtýsııalyq reformanyń basty maqsaty – ádiletti, ashyq ári halyq múddesine qyzmet etetin memleket qalyptastyrý ekeni jobada adam quqyqtaryn qorǵaý kepildikteriniń naqtylanyp, zań ústemdigin qamtamasyz etý men ashyqtyq qaǵıdattaryn ornyqtyrý máseleleri kórinis tapqanynan anyq baıqalatynyn aıtyp ótti.
«Qoǵam men zaman ózgergen saıyn zań da halyqtyń suranysyna saı jańaryp otyratyny anyq. Jańa Konstıtýsııa jobasynda «adam memleket úshin emes, memleket adam úshin» degen qaǵıdattyń berik ornyqqany árkimniń de kóńilinen shyǵady dep oılaımyn. Árbir normasy qoǵamnyń suranysy men usynysy negizinde ázirlengen joba áleýmettik turaqtylyq pen ornyqty damýǵa berik negiz qalaıdy», dedi kásipker.
Kezdesýde Konstıtýsııa jobasy ýaqyt talabynan týǵan qujat ekeni basa aıtyldy. Ashyq dıalog formatynda ótken kezdesýde partııa múshesi, qalalyq máslıhat depýtaty Aqmaral Tólegenova qoǵamnyń árbir múshesi el bolashaǵy úshin jaýapty naýqannan shet qalmaýy keregin aıtty.
Kezdesýde partııanyń oblystyq fılıalynyń jetekshisi Baýyrjan Sandybaev jańa joba elimizde kezeń-kezeńimen júzege asyrylyp kele jatqan saıası jańǵyrýlardyń jalǵasy ekenine toqtaldy.
Saýda ortalyǵy ujymy men kásipkerler «Halyq únine qulaq asatyn memleket» tujyrymdamasyn naqtylaı túsetin joba týraly pikirlerin jetkizdi.
Qyzylorda