«Ádiletti jáne progressıvti Qazaqstannyń halyqtyq Konstıtýsııasy úshin» jalpyulttyq koalısııasy músheleriniń óńirlerge saparlary jalǵasyp jatyr. Erlan Qoshanov bastaǵan delegasııa Shymkent qalasynyń turǵyndarymen birqatar kezdesý ótkizdi.
Ǵalymdar, eńbek ujymdary, mádenıet, sport jáne kommýnaldyq sala ókilderi Ata zań jobasynyń negizgi erejelerin jáne onyń el bolashaǵy úshin mańyzyn talqylady. Basty nazarda – adam, onyń eńbegi, bilimi jáne qaýipsizdigi.
M.Áýezov atyndaǵy Ońtústik Qazaqstan zertteý ýnıversıteti alańynda ǵylymı qaýymdastyqtyń, oqytýshylar men stýdentterdiń qatysýymen kezdesý ótti. Oǵan 300-den asa adam jınaldy. Is-sharada Erlan Qoshanov ýnıversıtet ulttyń zııatkerlik negizin qalyptastyratyn mańyzdy alań ekenin erekshe atap ótti.
«Biz bıik muratqa, uly maqsattarǵa bet alǵan ultpyz. Aldymyzda aýqymdy, irgeli ister kútip tur. Biz ádildik saltanat qurǵanda ǵana bıik belesti baǵyndyramyz. Zań men tártip ústemdik qurǵanda ǵana degenimizge jetemiz. Jastarymyz bilim men ǵylymnyń, ınnovasııa men tehnologııanyń tilin tolyq ıgerse ǵana ozyq elge aınalamyz. Oǵan myńjyldyq tarıhymyzben, tól mádenıetimizben jetemiz. Osynyń bári osy jańa Konstıtýsııada taıǵa tańba basqandaı kórinis taýyp otyr», dedi E.Qoshanov.
Talqylaý barysynda Májilis depýtaty Ekaterına Smolıakova Uly dalanyń myńjyldyq tarıhyna tán mádenı kodty saqtaýdyń mańyzdylyǵyn atap ótti.
Al Ǵylym jáne joǵary bilim mınıstri Saıasat Nurbek ýnıversıtetter men zertteý ortasy úshin damýdyń uzaqmerzimdi qaǵıdattary aıryqsha mańyzdy ekenin aıtty. Onyń aıtýynsha, mundaı qaǵıdattar memlekettik saıasattyń basymdyqtaryn aıqyndap, ınstıtýsıonaldyq avtonomııa deńgeıin anyqtaýǵa jáne eldiń básekege qabilettiliginiń negizi retinde ǵylymnyń rólin kúsheıtýge múmkindik beredi.
Ońtústik Qazaqstan pedagogıkalyq ýnıversıtetiniń prorektory Barshagúl Isabek kez kelgen qýatty memlekettiń taǵdyry onyń zańdarymen, tarıhı sabaqtastyǵymen jáne halyq rýhymen aıqyndalatynyn atap ótti. Onyń aıtýynsha, jańa Konstıtýsııa preambýlasynda Uly dalanyń myńjyldyq tarıhyn saqtaý týraly aıtylatyn erejeler ata-babalar amanatyna adaldyqty kórsetedi jáne Qasym hannyń «Qasqa joly», Esim hannyń «Eski joly» jáne Táýke hannyń «Jeti jarǵysynan» bastaý alatyn dala demokratııasy dástúrleriniń jalǵasy.
Al Muhtar Áýezov atyndaǵy ýnıversıtettiń saıasattaný kafedrasynyń meńgerýshisi Ardaq Montaev halyqaralyq tájirıbege nazar aýdaryp, álemdegi 190 eldiń shamamen 110-ynda bir palataly Parlament bar ekenin atap ótti.
Odan keıin koalısııa músheleri «Eńbekshi» kommýnaldyq kásipornynyń qyzmetkerlerimen kezdesti. Sanıtarlyq tazalyq qyzmetkerleri, júrgizýshiler men kommýnaldyq sharýashylyq mamandary turaqty jumyspen qamtýdyń, eńbek qaýipsizdiginiń jáne áleýmettik qorǵalýdyń mańyzy týraly aıtty.
«PetroQazaqstan Oıl Prodakts» JShS munaı óńdeý zaýytynda zań men tártip, ádildik pen jaýapkershilik qundylyqtary týraly aıtyldy. Kásiporyn qyzmetkerleri eńbek etý quqyǵyn qorǵaýǵa, ádil eńbekaqy men qaýipsiz eńbek jaǵdaılaryn qamtamasyz etýge baǵyttalǵan zańnamalyq normalardyń mańyzyna toqtaldy. Sondaı-aq ekologııalyq mádenıet pen qorshaǵan ortaǵa uqypty qaraý máselelerine erekshe nazar aýdaryldy. Bul baǵyttar memlekettik saıasattyń uzaqmerzimdi basymdyqtary bolýǵa tıis ekeni aıtyldy.
Kezdesýler odan ári jalǵasyn taýyp, Shymkent jastar teatry alańynda mádenıet salasynyń ókilderimen júzdesti. Ártister men shyǵarmashylyq mamandyq ıeleri mádenıet, bilim men rýhanı qundylyqtar ulttyq biregeılikti saqtaýdyń jáne otansúıgishtikti tárbıeleýdiń berik negizin qalyptastyratynyn atap ótti.
Osy kúni Koalısııa músheleri sportshylarmen, jattyqtyrýshylarmen de kezdesti. Sport qaýymdastyǵynyń ókilderi ádildik, adal báseke, tártip pen jaýapkershilik qundylyqtary sporttyń da, qýatty memlekettiń de negizinde jatqanyna toqtaldy. Jattyqtyrýshylar túsindirý jumysyna belsendi qatysýǵa jáne jastardyń zańǵa, eńbekke ári azamattyq jaýapkershilikke degen qurmetin qalyptastyrýǵa daıyn ekenin jetkizdi.
Kezdesýlerge qatysqan Shymkent turǵyndary 15 naýryz kúni jańa Konstıtýsııa jobasy boıynsha ótetin referendýmǵa qatysýǵa daıyn ekenderin bildirdi.