Qazaqta «bir kún araq ishkenniń úıinde qyryq kún bereke» bolmaıdy deıdi. Ǵalymdar da osy sózdi qýattaǵandaı, alkogol aǵzadan qyryq kúnde taraıtynyn aıtady. Biraq qasıetti Ramazan aıynyń aldynda tentek sýdan urttap qoıǵan adam elmen birge aýyz bekite ala ma? Múftııat jaýap berdi, dep habarlaıdy Egemen.kz.
Sharıǵat araq-sharap ishýge qatań tyıym salady. Bul týraly Quran Kárimniń «Máıda» súresinde bylaı deıdi:
«Ýa, ıman keltirgender! Aqıqatynda, araq, qumar oıyndary, puttar hám (bal ashýǵa tigiletin) jebeler – shaıtannyń las isterinen. Odan aýlaq bolyńdar, bálkim, muratqa jetersińder!».
Muhambet paıǵambar da araq ishken jannyń qyryq kúndik namazy qabyl bolmaıdy degen hadısi jetken.
Dinı basqarma hadıs tápsirshisi Imam Naýaýıdiń myna sózin tııanaq qylady. Ol hadıstegi «namazy qabyl bolmaıdy» degen sózdi paryzy moınynan túsedi, biraq saýaby joǵalady dep túsindirgen. О́ıtkeni namazdy mas kúıinde oqýǵa bolmaıdy.
Soǵan oraı múftııattyń pátýa bólimi bylaı dep tujyrymdaıdy:
«Namaz saýabynyń joǵalýy táýbe etpeı, araq ishýdi doǵarmaýyna baılanysty. Eger shynaıy táýbe etse, bul jaza (namazdyń saýaby joǵalýy) da onyń moınynan túsiriledi. О́ıtkeni shynaıy táýbe aldyńǵy istegen kúná isti joıady. Osyǵan oraı oraza ustaýshy Ramazan aıynan eki kún buryn araq iship, sońynan shynaıy táýbe etse, Alla onyń táýbesin qabyl etedi. Onyń orazasy araq ishpeı oraza tutqan adamnyń orazasyndaı bolady. Al oraza ustap araq ishýin doǵarmasa, orazasy durys bolady, biraq saýaby bolmaıdy. Araq ishkeni úshin kúná arqalaıdy».
Aıta keteıik, musylman jurtshylyǵy aqpannyń 18-inen 19-yna qaraǵan túni aýyz bekitedi.
Dinı basqarmanyń bekitýimen bıylǵy jyldyń pitir sadaqasy elimiz boıynsha eki keli unnyń ortasha baǵasy negizinde 735 teńgeni qurady.