Semeı qalasynda áleýmettik osal toptaǵy azamattarǵa jáne jetim balalarǵa páter kiltteri saltanatty túrde tabystaldy, dep jazady Egemen.kz.
Ákimdiktiń dereginshe, osy baǵyttaǵy júıeli jumystardyń nátıjesinde 2025 jyly oblys ortalyǵynda barlyǵy 327 jalǵa beriletin páter satyp alyndy. Sonyń ishinde Ushaqtar kentinde ornalasqan 5 qabatty, 60 páterli turǵyn úı «Otbasy bank» AQ arqyly kezekte turǵan azamattarǵa bólý úshin berildi.
Jıynǵa qatysqan óńir basshysy Berik Ýálı jańa qonys ıelerin qýanyshty mezetpen quttyqtap, Memleket basshysynyń tapsyrmasyna sáıkes óńirde turǵyndardy baspanamen qamtý baǵytynda júıeli jumys júrgizilip jatqanyn jetkizdi.
«Qalamyz kúnnen kúnge kórkeıip keledi. Turǵyndardyń ómir sapasyn arttyrý baǵytynda aýqymdy jumys atqarylyp jatyr. Igi isterdiń jalǵasy retinde búgin biz erekshe sáttiń kýási bolǵaly otyrmyz. Búgin 26 páterdiń kilti tabystalmaq. Al jaqyn kúnderi taǵy 34 otbasy osy úıden baspanaly bolady. Sonda bir úıdiń ózinen ǵana 60 adam qonys toıyn toılaıdy. Bul baspanalar áleýmettik osal toptaǵy azamattarǵa, jetim balalarǵa berilip otyr. Bul – jaı ǵana úı emes, bul – jańa ómirge bastar jol, úmit pen senimniń sımvoly. Sondaı-aq, naýryz aıyndaǵy merekelerde kezegi kelgen otbasylarǵa páter kiltin tabystaımyz. Qonys toıy qutty bolsyn! Jańa baspana jańa baqyt ákelsin!», dedi ol.
Baspanaly bolǵan turǵyndar óz rızashylyqtaryn bildirdi.
«Bizdiń otbasymyz úshin búgin – erekshe qýanyshty kún. Sebebi, 11 jyl úı kezeginde turyp, taǵatsyzdana kúttik. Jańa baspanaǵa qol jetkizgenimizge rızamyz. Halyqtyń jaǵdaıyn jasap, qoldaý kórsetip jatqandaryńyzǵa alǵys aıtamyz», dedi qala turǵyny Janna Imanǵazına.
Oblys ákimi Semeı qalasyn abattandyrý jumysy jalǵasatynyn, bıyl 75 kóshege asfalt tóselip, 100-ge jýyq aýlanyń jańǵyrtylatynyn aıtty. Aıta keteıik, byltyr 52 kóshe asfalttalyp, 35 aýla abattandyrylǵan bolatyn.
Semeıde 100 oryndyq medısınalyq-áleýmettik nysan ashyldy
Ushaqtar kentiniń damýyna da erekshe kóńil bólinedi. Qazirgi ýaqytta jańa saıabaq pen sporttyq saýyqtyrý kesheni salynyp jatyr. Eki ǵımarattan turatyn sport nysany – «Samuryq qazyna» ál aýqat qory men oblys ákimdiginiń birlesken jobasy.
Byltyr Qaraǵaıly yqsham aýdanynda 27 myń sharshy metrdi quraıtyn 5 turǵyn úı paıdalanýǵa berilgen edi. Bıyl «Abaı jastary» baǵdarlamasy aıasynda taǵy 30 páter berilmek.
Semeı stýdentteriniń sporttyq ınfraqurylymy jańardy