Qostanaıda «Jas qoldaýshy» degen taqyryp aıasynda jastar forýmy ótti. Myńnan asa stýdent, volonterler bas qosqan is-sharaǵa oblys ákimdigi, prokýratýra, quqyq qorǵaý organdarynyń ókilderi qatysyp, búgingi qoǵamda «Zań men tártip» qaǵıdatyn ornyqtyrýdyń mańyzy týrasynda oılaryn ortaǵa saldy.
Forým barysynda oblys ákimi Qumar Aqsaqalov búginde elimizde jańa qundylyqtar qalyptasyp, halyqtyń quqyqtyq mádenıeti artyp kele jatqanyn tilge tıek ete kelip, óńirde qylmystyń aldyn alý maqsatynda jáne jastardy áleýmettik qoldaý baǵytynda atqarylyp jatqan jumystarǵa toqtaldy. Ákimniń aıtýynsha, 2022 jyly oblys aýmaǵynda 6 859 qylmystyq quqyq buzýshylyq tirkelgen. Osy kórsetkishti azaıtý maqsatynda turǵyndardyń, sonyń ishinde jastardyń quqyqtyq jaýapkershiligin arttyrýǵa baǵyttalǵan aýqymdy jumys atqarylǵan.
«Atap aıtqanda, qoǵamdyq oryndarda elektrondyq baqylaý qurylǵylary ornatylyp, polısııanyń materıaldyq-tehnıkalyq áleýeti kúsheıtildi. Jol qozǵalysy erejelerin buzýshylardy avtomatty tirkeý júıeleri jaqsaryp keledi. Sonymen qatar jastardy jumyspen qamtamasyz etý, turǵyn úı máselesi de ret-retimen sheshimin taýyp jatyr. Keıingi jyldary Qostanaıda zamanaýı talaptarǵa saı birneshe zaýyt iske qosyldy. «KIA», «Kamlıt» sekildi kompanııalarda birneshe myńdaǵan jumys oryndary ashyldy. Bul – bizdiń jastarǵa berilip otyrǵan zor múmkindik. Búginde jańa ónerkásip oryndarynda eńbek etip jatqan jumysshylardyń 55 paıyzyn jastar quraıdy. О́ńirde júzege asyrylyp jatqan «Qostanaı jastary» jobasy aıasynda 344 jas otbasy baspanaly boldy. Bıyl osy joba sheńberinde taǵy 100 jas otbasy páter alady», dedi Q.Aqsaqalov.
Is-sharany uıymdastyryp otyrǵan oblystyq prokýratýra ókilderi jastar arasynda quqyqtyq mádenıetti qalyptastyrý maqsatynda oqý oryndarynda túrli mazmundaǵy is-sharalar ótkizgen. Osyndaı keshendi jumystardyń nátıjesinde oblysta keıingi úsh jyl ishinde qylmys deńgeıi 28 paıyzǵa azaıǵan. Forýmda sóz alǵan oblys prokýrory Marat Seksembaev osy jaıttarǵa toqtala kelip jastarǵa aqyl-keńesin aıtty.
«Barlyǵyńyz – jaqsy, jamannyń ne ekenin ajyrata alatyn jastasyzdar. Aldaryńyzdan san taraý tańdaý kútip tur. Sondyqtan árqaısyńyzǵa aldaǵy jarqyn ómirlerińizge jol salatyn durys tańdaý jasaı bilý mańyzdy. О́ıtkeni mektep, ýnıversıtette sabaqta jibergen qateligi úshin bireý «úshtik», bireý «tórttik» baǵa alyp jatady. Keıbir qatelikterdi túzetýge bolady. Keshigip qalsań, keleside keshikpeýge tyrysasyń, bireýdi renjitseń, keshirim suraısyń. Al eresek ómirdegi qateliktiń quny múlde basqa. Keıbir túzetilmeıtin qatelikter bolady. О́mir dep atalatyn bul sapar adamǵa bir-aq ret beriledi. Sondyqtan sizderden ótinerim – árdaıym durys tańdaý jasaýǵa umtylyńyzdar. Iá, búgin statıstıka jaqsaryp keledi. Biraq keıingi bes jylda oblysta 91 jasóspirimniń sottalǵanyn aıtpasqa taǵy bolmaıdy. Sondyqtan qazirden bastap jaqsy men jamannyń parqyn aıyra bilip, durys joldy tańdaý mańyzdy», dedi M.Seksembaev.
Forým aıasynda «Jas qoldaýshy» tálimgerler klýby atty jańa jobanyń tusaýkeser rásimi ótti.
«Atalǵan klýbty jastarǵa aqyl-keńes beretin, qoldaý kórsetetin, qıyn jaǵdaıda qolushyn sozyp kómek beretin ortalyq desek te bolady. Maqsatymyz – izimizdi basyp kele jatqan ini-qaryndastarymyzǵa durys baǵyt-baǵdar berý, jol silteý. Biz zań men tártip, bilim men parasat ústemdik quratyn qoǵam qurýymyz kerek. Al jaza bassa, jazaǵa tartylatyndyǵyn árkim bilýge tıis. Búginde jastar arasynda zańmen tyıym salynǵan taýarlardy taratyp júrgender kóp. Ońaı oljaǵa kenelemin dep adasyp jaza basqan keıbir zamandastarymyz qylmystyq jaýapkershilikke tartylyp, 5 jyldan 10 jylǵa deıin bas bostandyǵynan aıyrylyp jatyr. Sonyń bárin jastarǵa túsindirip, jaqsylyqqa qaraı jetelep, jón kórsetýdi kózdep otyrmyz», deıdi klýb múshesi Saıd Ahmatjanov.
Is-shara sońynda jastar forýmǵa arnaıy kelgen «Patrýl» telehıkaıasynyń akterlerimen kezdesti.
Qostanaı oblysy