AQTО́BE. 13 mamyr. Aqtóbede Jeńistiń 70 jyldyǵyna oraı oblystyq sottyń bastamasymen Uly Otan soǵysy jáne sot júıesi ardagerleriniń qurmetine memorıaldyq taqta ashyldy. Bul týraly egemen.kz tilshisi habarlady.
Atalǵan eskertkish oblystyq sot ǵımaratynyń aldynda ornatyldy. Sharaǵa oblys ákiminiń orynbasary Muhtar Jumagazıev, oblystyq ardagerler keńesiniń tóraǵasy Keńes Birmanov, quqyq qorǵaý organdarynyń ókilderi, oblys ortalyǵyna jaqyn ornalasqan jergilikti sot tóraǵalary, oblystyq sot sýdıalary, oblystyń sot júıesiniń ardagerleri, ómirden ótken soǵys jáne tyl ardagerleriniń jubaılary, olardyń urpaqtary qatysty.
Saltanatty rásimde sóz alǵan oblystyq sottyń tóraǵasy Erlan Aıtjanov jınalǵan qaýymdy Uly Jeńistiń 70 jyldyq mereıtoıymen quttyqtap, sharaǵa qatysýshylarǵa myqty densaýlyq, uzaq ǵumyr, otbasylaryna baqyt, tiledi. Ardagerlerge maıdandaǵy erlikteri men tyldaǵy eńbekteri úshin alǵys sezimin bildirdi. Sot júıesinde jıyrma bes jyldan astam adal qyzmet atqarǵan eńbek ardageri Keńes Júsipov aǵa býyn áriptes sýdıalar men eskertkish taqtaǵa engen soǵys ardagerleri týraly jyly lebizge toly estelikterimen bólisti.
Memorıaldyq taqtany oblystyq sot tóraǵasy Erlan Aıtjanov pen sot júıesiniń ardageri Sovet Muhambetqalıev saltanatty túrde ashty. Uly Otan soǵysynyń jáne sot júıesiniń ardageri Omarbek Berdıevtiń qyzy Kamshat Berdıeva ákesiniń atyn memorıaldyq taqtaǵa engizgeni úshin oblystyq sottyń basshylyǵyna rızashylyǵyn jetkizdi.
Satybaldy Sáýirbaı.
Derek, sýret: egemen.kz.