Qasym-Jomart Toqaev Masato Kandaǵa iltıpat kórsetip, ADB jetekshisi laýazymyna kiriskenine bir jyl bolǵanymen jáne banktiń aldaǵy 60 jyldyq mereıtoıymen quttyqtady, dep jazady Egemen.kz Aqordanyń baspasóz qyzmetine silteme jasap.
Qazaqstan Prezıdenti 30 jyldan astam ýaqyt ishinde Azııa damý banki elimizde jalpy somasy 7 mıllıard dollardan asatyn 170-ten asa jobaǵa qoldaý kórsetkenin aıtty. Osylaısha, bank ekonomıkalyq ósimge, ınfraqurylymdy jańǵyrtýǵa jáne azamattardyń turmys sapasyn jaqsartýǵa aıtarlyqtaı úles qosty.
Memleket basshysy ekonomıkanyń basty sektorlaryndaǵy aýqymdy jobalardy júzege asyrý jospary jóninde áńgimeledi. Bul elimizde ornyqty damý men qurylymdyq ózgeristerdi qamtamasyz etý maqsatynda qolǵa alynǵan.
Masato Kanda Azııa damý banki Qazaqstanmen aradaǵy yqpaldastyq aıasyn keńeıtýdi basym baǵyt sanaıtynyn jetkizdi. Bank turǵyn úı qurylysy, tótenshe jaǵdaılardy basqarý jáne ózge de mańyzdy strategııalyq jobalardy qarjylandyrýǵa daıyn ekenin rastady.
ADB jetekshisi elimizdiń sıfrlyq tehnologııalar men jasandy ıntellektini engizý boıynsha aldyńǵy orynda turǵanyn atap ótip, asa mańyzdy mıneraldar sektoryn ilgeriletýde, iri ınvestısııalyq bastamalardy iske asyrýda zor áleýet bar ekenine toqtaldy.
Qasym-Jomart Toqaevtyń aıtýynsha, Qazaqstan men Azııa damý banki arasynda ornyqty jáne uzaq merzimdi seriktestik ornaǵan, elimiz ózara tıimdi kooperasııany odan ári keńeıtýge ázir.
Buǵan deıin Memleket basshysynyń Bahreın Korolimen telefon arqyly sóıleskenin habarlaǵanbyz.