Premer-mınıstr Oljas Bektenov pen Azııa damý bankiniń (ADB) prezıdenti Masato Kanda Prezıdent Qasym-Jomart Toqaev belgilegen strategııalyq baǵyttar sheńberinde ınvestısııalyq yntymaqtastyqty damytý men ınfraqurylymdyq jáne áleýmettik mańyzy bar jobalardy qarjylandyrý máselelerin talqylady.
Kezdesý barysynda kólik jáne logıstıka, TJ, sıfrlyq tehnologııalardy damytý, turǵyn úı naryǵy, «jasyl» qarjylandyrý baǵytyndaǵy jobalar jóninde sóz boldy. Sondaı-aq jasandy ıntellekt, data-ortalyqtar salý, talshyqty-optıkalyq magıstraldar júrgizý, kólik dálizderi men kedendik rásimderdi sıfrlandyrý salasyndaǵy yntymaqtastyqty damytý áleýeti týraly atap ótildi. Qaraǵandyda kadrlar daıarlaý jáne ǵylymı zertteýler júrgizý úshin 300 tósektik orynǵa arnalǵan ýnıversıtettik aýrýhana salý boıynsha MJÁ jobasyn júzege asyrý barysy qaraldy.
Premer-mınıstr Memleket basshysy Qasym-Jomart Toqaev Qazaqstannyń ınfraqurylymdy jańǵyrtý jónindegi negizgi áriptesteriniń biri – Azııa damý bankimen jan-jaqty ózara is-qımylǵa erekshe mán beretinin atap ótti. Yntymaqtastyq sapaly ósimge jáne halyqtyń ál-aýqatyn arttyrýǵa basa nazar aýdara otyryp, ekonomıkalyq damýdy transformasııalaýǵa baǵyttalǵan.
Azııa damý bankiniń prezıdenti Masato Kanda qarjy sektorynyń turaqtylyǵyn arttyrýdy qosa alǵanda, elimizdiń qurylymdyq reformalar boıynsha júrgizip jatqan jumysyn joǵary baǵalady, sondaı-aq ekonomıka sektorlaryn aýqymdy túrde sıfrlandyrýdy qoldaýǵa múddeli ekenin bildirdi.
Úkimet pen Azııa damý banki arasynda 2026–2029 jyldar aralyǵynda jalpy somasy shamamen 5,5 mlrd dollar bolatyn 15 keleshegi zor jobany júzege asyrý boıynsha ózara túsinistik týraly memorandýmǵa qol qoıyldy. Qujat ekonomıkada jańa aýqymdy jobalardy júzege asyrý úshin múmkindik ashady. Atap aıtqanda, óńirlik ózara baılanys, tabıǵı apattarǵa tózimdilikti arttyrý, sý resýrstaryn basqarý, TKSh, turǵyn úı naryǵyn damytý jáne taǵy da basqa baǵyttar boıynsha bastamalar josparlanǵan. Sondaı-aq ADB jeke sektordy, onyń ishinde AО́K, kólik jáne logıstıka sııaqty basqa da salalardaǵy jobalardy qarjylandyrýdy jalǵastyrady.
Sonymen qatar «QazAvtoJol» UK» AQ pen Azııa damý banki arasynda Saryaǵash qalasyn aınalyp ótetin, uzyndyǵy 102 shaqyrym bolatyn aınalma jol salý jobasy boıynsha kelisimshartqa qol qoıyldy. Atalǵan jol B.Qonysbaev atyndaǵy ótkizý pýnkti arqyly О́zbekstanǵa shyǵýdy qamtamasyz etedi. Jańa jol tranzıttik aǵyndy eldi mekennen tys jerlerge shyǵarýǵa múmkindik beredi, avtomobıl qatynasyn jedeldetedi jáne Qazaqstan men О́zbekstan arasyndaǵy saýdanyń tıimdiligin arttyrady.