Premer-mınıstr Oljas Bektenov «Egemen Qazaqstan» gazetinde jarııalanǵan «Jasampazdyqqa jetelegen jeti jyl» atty maqalasynda Memleket basshysy jarııalaǵan «Taza Qazaqstan» bastamasynyń jalpyulttyq ıdeıaǵa ulasqanyna toqtaldy, dep jazady Egemen.kz.
Onyń aıtýynsha búkil el boıynsha mıllıondaǵan adam ekologııalyq aksııalarǵa shyǵyp, tabıǵı aımaqtardy qoqystan tazartý, kógaldandyrý, qalpyna keltirý jumystaryn júrgizip jatyr. Júzdegen myń tonna qoqys jınalyp, mıllıondaǵan aǵash kóshetteri otyrǵyzyldy. Osy ıdeıanyń arqasynda ekologııalyq mádenıet qalyptasyp, tazalyq pen tártip kúndelikti ómir saltyna aınaldy.
«Prezıdent «Árkim ózinen bastaýy kerek» qaǵıdatyna óz tájirıbesimen úlgi kórsetip keledi. Memleket basshysy qorshaǵan ortanyń ǵana emes, adamnyń oı-sanasynyń tazalyǵyna da aıryqsha mán beredi. Bul bastama el azamattarynyń, ásirese jastardyń tarapynan qoldaý taýyp, aýqymdy qozǵalysqa aınaldy», dedi Oljas Bektenov.
«Taza Qazaqstan» jańa Konstıtýsııanyń ózegine aınalmaq
Úkimet basshysy sondaı-aq ekologııalyq kún tártibinde Memleket basshysy sý qaýipsizdigi máselesine basa nazar aýdaryp otyrǵanyn aıryqsha atap ótti.
«Prezıdent tapsyrmasy boıynsha qazir 20 jańa sý qoımasyn salý, keminde 15 myń shaqyrym ırrıgasııalyq kanaldy rekonstrýksııalaý baǵdarlamasy júzege asyrylyp keledi. Elimizdegi kólemdi sý aıdyndary – Kaspıı men Aral teńizderin saqtap qalý máselesi birinshi kezekke shyqty. Elimizde atalǵan akvatorııanyń ózekti máselelerin tereń zerdeleý úshin Kaspıı teńiziniń Qazaq ǵylymı-zertteý ınstıtýty quryldy. Jınaqtap kelgende bul ekologııalyq qaýipsizdik pen tabıǵatty turaqty paıdalanýdyń keshendi tásilin qalyptastyrady», dedi Premer-mınıstr.
Jahandyq sý resýrstary taqyrybyndaǵy mańyzdy máselelerdiń biri – muzdyqtardy saqtap qalý. Sarapshylardyń boljamynsha, 2100 jylǵa qaraı Ortalyq Azııadaǵy muzdyqtar kólemi aıtarlyqtaı kishireıedi. Bektenov Prezıdenttiń osy máselelerge de aıryqsha nazar aýdaryp otyrǵanyn aıtty.
«Qasym-Jomart Toqaev halyqaralyq deńgeıde «Sý munaralary seriktestigin» qurý bastamasyn kóterdi, onyń maqsaty – muzdyqtardy zertteý ári qorǵaý úshin jahandyq zertteý ortalyqtarynyń kúsh-jigerin biriktirý, sol arqyly glıasıologııalyq ǵylymdy qoldaýdy ortaq bir júıege keltirý», dedi ol.
«Taza Qazaqstan»: Abaı ýnıversıtetiniń stýdentteri Ile-Alataý parkimen ekologııalyq jobalardy iske asyrady