Roza Baǵlanova atyndaǵy «Qazaqkonsert» memlekettik akademııalyq konserttik uıymynda «Astana sazy» Qazaq memlekettik folklorlyq ansambliniń «Aspaptar sherýi» atty jeke konserti ótti.
Kóktemniń alǵashqy kúnimen tuspa-tus kelgen keshke kórermen kóp jınaldy. Konsertte ulttyq dástúrli mýzyka alýan túrli kompozısııamen saltanat qurdy. Sonymen qatar keshte folk, etno-djaz, etno-pank jáne zamanaýı ún ádemi úılesim tapqan. Baǵdarlama aıasynda qazaq mýzykasynyń tamasha týyndylary oryndaldy.
Kesh barysynda Qazaqstannyń eńbek sińirgen qaıratkeri Erbolat Shaldybekov, «Daryn» memlekettik jastar syılyǵynyń laýreaty Ádilhan Makın, respýblıkalyq jáne halyqaralyq baıqaýlardyń laýreattary Zańǵar Múbárakov, Jantý Dadabaev, Aqqanat Smaǵulova, Jaslan Kárim sekildi talantty ártister óner kórsetti. Olardyń áýeletip salǵan ánderi men kúmbirletip tartqan kúıleri tyńdarmannyń qulaq quryshyn qandyrdy. Myń buralǵan bıshilerdiń sheberligi de jurtshylyqty tánti etti.
Aıta keteıik, «Astana sazy» – elimizdegi jetekshi shyǵarmashylyq ujymnyń biri. Ansambl mýzykanttary dombyra, qobyz, sherter, shańqobyz, saz syrnaı, sybyzǵy, asataıaq, daýylpaz, tuıaqtas, qońyraý sekildi halyq mýzykalyq aspaptarynda keremet oınaıdy. Ujymnyń kórkemdik jetekshisi – Nurken Iаkııaev.
Bir jaǵynan, folklorlyq ansambldiń repertýary óte baı. Ásirese onda túrli halyqtardyń dástúrli aspaptyq mýzykasy men zamanaýı avtorlyq shyǵarmalar qamtylǵan. Sondaı-aq buǵan deıin ujym ártisteri Tájikstan, О́zbekstan, Qyrǵyzstan sekildi birneshe elde óner kórsetken.