Qazaqstannyń Armenııadaǵy elshiliginiń kómegimen Irandaǵy Zarkýh altyn óndirý kásipornynda jumys istep júrgen 34 azamatymyz Armenııaǵa evakýasııalandy, dep jazady Egemen.kz.
Olar armıan-ıran shekarasyndaǵy «Agarak» baqylaý-ótkizý pýnkti arqyly avtobýspen ótip, Erevanǵa jetkizilgen.
«QazAqparattyń» habarlaýynsha, evakýasııalanǵan azamattar 5 naýryz kúni Máskeý arqyly tranzıtpen Almaty qalasyna ushyp keledi.
«Zarkýh» kásiporny IT-bóliminiń basshysy Andreı Sýharevtiń aıtýynsha, Irandaǵy jaǵdaı ýshyǵa bastaǵannan keıin kompanııa basshylyǵy evakýasııa týraly sheshimdi birden qabyldaǵan.
«Iranda áskerı qımyldar bastalǵannan keıin bizdiń basshylyq Qazaqstan azamattaryn elge qaıtarý týraly jedel sheshim qabyldady. Tıisti tizimder daıyndalyp, Armenııadaǵy Qazaqstan elshiligine jiberildi. Elshilik jergilikti bılik organdarynyń kómegimen Iran-Armenııa shekarasynda «jasyl dáliz» uıymdastyrdy. Jaǵdaı turaqtalyp, jumysymyzǵa qaıta oralamyz dep úmittenemiz. Sonymen qatar elshilik qyzmetkerlerine jedel kórsetken kómegi úshin erekshe alǵysymyzdy bildiremiz», dedi Andreı Sýharev.
Iranda júrgen qazaqstandyqtar elge qalaı oralady?
Eske sala keteıik, Izraıl 28 aqpan, senbi kúni tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı otyr. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Búǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
Keshe Dýbaıdan Oman arqyly 467 otandasymyz elge jetkizildi. Sonymen qatar Flydubai áýe kompanııasy Dýbaı qalasynan Astana jáne Almaty qalalaryna eki evakýasııalyq reısti oryndady. Búginge deıin elimizge Taıaý Shyǵys elderinen 946 jolaýshy qaıtarylǵan.