Almaty oblysynda sıfrlyq tehnologııanyń múmkindikterin kórsetken erekshe dron-shoý ótti. 500-den astam dron Qonaev qalasynyń kóginde qalyqtap, kórermenderge áserli jaryq kompozısııalaryn usyndy. Aspanda Qazaqstan kartasy beınelengen sátte jınalǵan jurt erekshe qýanyshyn jasyra almady, dep jazady Egemen.kz.
Budan bólek, shoý barysynda ulttyq qundylyqtardy aıshyqtaıtyn, qazaq halqy úshin bereke men birliktiń belgisi sanalatyn shańyraq beınesi, kóktem men jańarýdyń nyshany – qyzǵaldaq gúli men «Digital Nauryz», «Naýryz qutty bolsyn!» degen merekelik jazý beınelendi. Sonymen birge «Qazaqstan», «Almaty oblysy» degen jazýlar da paıda boldy. Bul óńirdiń el damýyndaǵy orny men mańyzyn bildiretin sımvoldyq kóriniske aınaldy.
Shoý barysynda el ómirindegi mańyzdy saıası oqıǵaǵa arnalǵan kompozısııalar da usynyldy. Aspanda «15 naýryz – referendým» jáne «Jańa Konstıtýsııa» degen jazýlar paıda bolyp, aldaǵy respýblıkalyq referendýmnyń máni men mańyzyn jetkizdi. Sonymen qatar daýys berý belgisi beınelenip, azamattyq jaýapkershilik pen árbir azamattyń óz tańdaýyn jasaý quqyǵy sımvoldyq túrde kórsetildi.
Dron-shoýdy tamashalaýǵa 5 000-nan astam kórermen jınaldy, olardyń qatarynda Almaty oblysy ákiminiń orynbasary Ǵanı Maılybaev, koalısııa músheleri, zııaly qaýym ókilderi de boldy. Jınalǵan kópshilik aldynda Almaty oblystyq Ardagerler keńesiniń tóraǵasy Erbolat Turymbetov pen Almaty oblystyq Qoǵamdyq keńesiniń tóraǵasy Qazybek Daýtalıev sóz sóılep, oblys halqyn referendýmǵa belsendi qatysýǵa shaqyrdy.
«15 naýryz kúni ár azamat óz tańdaýyn jasaıdy. Bul – jastardyń Konstıtýsııasy. О́ıtkeni onda jastardyń damýyna, tulǵa retinde qalyptasýyna jáne el ekonomıkasynyń ilgerileýine basymdyq berilgen. Árqaısymyz óz daýysymyzdy berip, referendýmǵa qatysaıyq», dedi Erbolat Turymbetov.
Qazybek Daýtalıev óz sózinde qazirgi Konstıtýsııanyń el damýyna 30 jyl qyzmet etkenin atap ótip, jańa qujattyń mańyzdylyǵyna toqtaldy.
«Qazaqstannyń qoldanystaǵy Konstıtýsııasy halyqqa 30 jyl qyzmet etti. Búgin biz egemen el retinde jańa mańyzdy qujatty qabyldaý múmkindigine ıe bolyp otyrmyz. Jańa Konstıtýsııa jobasynda eńbek quqyq retinde belgilengen. Iаǵnı halyqty jumyspen qamtý – memlekettiń mańyzdy mindetteriniń biri», dedi ol.
Dron-shoýdan keıin kesh konserttik baǵdarlamamen jalǵasty. Shara barysynda qala turǵyndaryna respýblıkalyq referendým týraly aqparattyq broshıýralar taratyldy.
Almaty oblysy