Batys Qazaqstan oblysynda kámeletke tolmaǵan qyzdy zorlady degen kúdikpen 57 jastaǵy sheneýnik ustaldy. Bul oqıǵa buǵan deıin qoǵamda úlken rezonans týdyrǵan bolatyn. Aqpan aıynyń sońynda osy másele boıynsha Ishki ister vıse-mınıstri Sanjar Ádilov pikir bildirgen edi, dep habarlaıdy Egemen.kz.
Jábirlenýshi qyzdyń ákesiniń aıtýynsha, Shyńǵyrlaý aýdandyq ákimdigine qarasty mekemede jumys isteıtin 57 jastaǵy qyzmetker onyń qyzyn aldap úıine shaqyryp, zorlaǵan. Osy derekke baılanysty polısııa Qylmystyq kodeksiniń 120-baby («Zorlaý») boıynsha qylmystyq is qozǵaǵan.
Alaıda keıinirek tergeý barysynda polıseıler qyzdyń jazbalary men basqa da materıaldardy zerttegende kúsh qoldaný faktileri anyqtalmaǵanyn málimdedi. Tergeý nusqasyna sáıkes, qyz ben onyń anasy shaǵymdarynan bas tartqandyqtan is toqtatylǵan.
Almatyda 13 jastaǵy qyzdy zorlady degen kúdikti qamaýǵa alyndy
Soǵan qaramastan, jasóspirimniń ákesi memlekettik qyzmetkerdiń jazasyz qalmaýyn jáne istiń qaıta qaralýyn talap etken. Ol ózine qysym jasalǵanyn da aıtqan.
Osydan keıin prokýrorlar isti qaıta jańǵyrtyp, qosymsha tekserý júrgizdi.
Batys Qazaqstan oblysy polısııa departamentiniń habarlaýynsha, qylmystyq isti tergeý basqarmasy óz óndirisine qabyldap, qyzdyń ákesi keltirgen qosymsha málimetterdi sotqa deıingi tergeý aıasynda teksergen.
«Kámeletke tolmaǵan qyzdyń ákesi aıtqan qosymsha derekter tekserildi. Kúdikti ustalyp, qamaýǵa alyndy», delingen habarlamada.
Buǵan deıin vıse-mınıstr Sanjar Ádilov isti japqan polıseılerdiń áreketi de tekseriletinin aıtqan bolatyn. Eger olardyń tarapynan kiná nemese salǵyrttyq anyqtalsa, jaýapkershilikke tartylýy múmkin.