Altaı aýdanynda shyǵys jurty «Buqtyrma balyqshysy» respýblıkalyq festıvalin atap ótti. Bul kúni Buqtyrma sýqoımasyna qarmaqtaryn asynǵan balyqshylar elimizdiń túkpir-túkpirinen jınaldy.
Olardyń ishinde kásibı balyqshylar da, qarapaıym turǵyndar da boldy. Muz oıyp, qarmaq salǵandar arasynda oblys ákimi Nurymbet Saqtaǵanov ta júrdi.
Balyqshylar arasyndaǵy jarysqa qatysýǵa nıet bildirgender aldyn ala tirkelip, qaýipsizdik erejelerimen tanysty. Jankúıerler men kórermenderge uıymdastyrýshylar túrli oıyn-saýyq baǵdarlamasyn usyndy. Muz ústinde qonaqtarǵa arnaıy kıiz úı tigilip, jármeńke uıymdastyryldy. Qarmaq salmaǵandar tabıǵat aıasynda atqa minip, ıt jegilgen shanamen serýendedi. Sahnada qazaq estradasynyń juldyzy Erkin Nurjanov án shyrqap, kópshilikke kóterińki kóńil kúı syılady. Sonaý Kýbadan arnaıy kelgen «Proekt Ýmberto» toby Altaıdyń saqyldaǵan sary aıazyna qaramastan, áýelete án saldy. Jıylǵan jurt ónerpazdarǵa qoshemet kórsetip qolpashtady.
«Jyl saıyn qatysýshylar qatary artyp keledi. Mundaı sharalar týrızmdi damytýda, belsendi ári salamatty ómir saltyn nasıhattaýda mańyzdy ról atqarady. Aldaǵy ýaqytta da osyndaı bastamalardy qoldap, týrızmdi damytyp, Shyǵys Qazaqstan kartasynda jańa tartymdy oryndar qalyptastyra beremiz», dedi óńir basshysy Nurymbet Saqtaǵanov.
Kásibı balyqshylar men áýesqoılar baq synaǵan festıvalda úzdikter birneshe atalym boıynsha anyqtaldy. «Áıel balyqshy» atalymynda Irına Slamıhına jeńimpaz atanyp, 100 myń teńge aqshalaı syıaqyǵa ıe boldy. Eń úlken balyq aýlaǵan Galı Temirǵalıev «Big Fish» atalymynda úzdik shyqty. 3-oryn men 300 myń teńge syıaqyny Aıqyn Nurmuhambetov ıelendi. 2-oryndy Vladımır Karpenko jeńip aldy. Oǵan 400 myń teńge syıaqy berildi. Al «Buqtyrma balyqshysy» festıvaliniń bas júldesin jáne 500 myń teńge syıaqyny Bystrýha aýylynyń turǵyny Roman Ivanov jeńip aldy.
Shyǵys Qazaqstan oblysy,
Altaı aýdany