Túrkııa Respýblıkasy Joǵarǵy saılaý keńesiniń tóraǵasy Ahmet Iener Astana qalasyndaǵy №149 saılaý ýchaskesine baryp, Qazaqstanda ótip jatqan jańa Konstıtýsııa boıynsha referendým týraly pikir bildirdi, dep habarlaıdy Egemen.kz.
Ahmet Iener eń aldymen Qazaqstan halqyna sálem joldap, Naýryz meıramynyń bastalýymen tuspa-tus kelgen Amal kúnimen quttyqtady.
«Eń aldymen Qazaqstan halqyna sálem joldaımyn. Naýryzdyń bastaýy sanalatyn Amal kúnine oraı túrik halqynyń da ystyq sálemin jetkizgim keledi. Búgin Qazaqstanda mańyzdy kún – Konstıtýsııa boıynsha referendým ótýde», dedi ol.
Ol sondaı-aq ózi aralaǵan saılaý ýchaskelerinde azamattardyń belsendiligi joǵary ekenin atap ótti. Onyń sózinshe, daýys berý prosesi jaqsy ótip jatyr, al ýchaske qyzmetkerleri kásibı daıyndyqtan ótken.
«Biz barǵan saılaý ýchaskelerinde halyqtyń qyzyǵýshylyǵy joǵary ekenin baıqadyq. Ýchaske qyzmetkerleriniń bizge degen qarym-qatynasy óte jaqsy boldy. Bul Qazaqstannyń Ortalyq saılaý komıssııasy shamamen 70 myńǵa jýyq ýchaske qyzmetkerin sapaly daıyndaǵanyn kórsetedi. Osy rette OSK tóraǵasy Nurlan Ábdirov pen onyń janyndaǵy qyzmetkerlerge alǵys aıtqym keledi», dedi ol.
Ázerbaıjandyq baqylaýshy referendýmǵa oń baǵa berdi
Ahmet Iener saılaý ýchaskelerinde baqylaýshylardyń da jumys istep jatqanyn aıtyp, muny demokratııanyń mańyzdy belgisi dep baǵalady.
«Qazirgi ýaqytta daýys berý ashyq ári tynysh jaǵdaıda ótip jatqanyn kórip otyrmyz. Biz alǵan aqparatqa sáıkes, osy sátte saılaýshylardyń qatysý deńgeıi shamamen 40 paıyzǵa jýyq. Bul kún sońyna qaraı kórsetkish 70–75 paıyzdan joǵary bolýy múmkin ekenin bildiredi», dedi ol.
Túrkııa Joǵarǵy saılaý keńesiniń tóraǵasy sondaı-aq Qazaqstan men Túrkııadaǵy saılaý júıelerin salystyryp, eki eldegi tájirıbeniń kóp jaǵynan uqsas ekenin atap ótti.
«Ár eldiń saılaý júıesi óz ereksheligine qaraı qalyptasady. Degenmen jalpy alǵanda eki eldegi saılaý tájirıbesiniń shamamen 70 paıyzy uqsas. Mysaly, munda múmkindigi shekteýli azamattarǵa daýys berý úshin belgili bir ýaqyttan keıin úılerine baryp, daýys berý múmkindigi jasalady. Túrkııada da osyndaı tájirıbe bar, bizde jyljymaly saılaý jáshikteri qoldanylady. Sonymen qatar kórý qabileti nashar azamattarǵa arnalǵan arnaıy traferet eki elde de bar», dedi Ahmet Iener.
Referendýmda daýys bergender sany 51,93 paıyzǵa jetti
Onyń aıtýynsha, keıbir tehnıkalyq aıyrmashylyqtar saılaýshylardy tirkeý júıesinde ǵana kezdesedi. Bul ár memlekettiń óz zańnamasy men jaǵdaıyna baılanysty qalypty qubylys ekenin atap ótti.
Ahmet Iener referendým nátıjeleri Qazaqstan halqy men eldegi demokratııalyq úderister úshin paıdaly bolady degen senim bildirdi.