PETROPAVL. 13 mamyr. Osydan úsh aı buryn belomyrtqasyn syndyryp alyp, sodan beri tósek tartyp jatqan keıýanaǵa kórshilerinen basqa qaraılasatyn eshkim baıqalmaıdy. О́zdiginen qozǵalýǵa ál-dármeni joq beıbaq qarttar úıine ornalastyrýǵa sheneýnikterden kómek surap otyr. Bul týraly KTK telearnasy habarlady.
Jasy seksendi alqymdaǵan Nadejda Podlesnaıa naýryzda aýrýhanada jatyp shyqqan. Sodan beri ómirdiń aýyr taýqymetin tartyp keledi. Kórshileri as-sýyna ǵana qaraılasady. Kórpe-tósegin jýatyn, shomyldyratyn adam joq.
«О́zdiginen júre almaǵandyqtan, túni boıy aıǵaılap, járdem suraıdy. Estýimizshe, buǵan deıin ul-qyzdarymen Aqtaýda turǵan. Ondaǵy páterin balalary satyp jiberip, Petropavldaǵy jataqhanadan bir bólme ápergen. О́zderi Reseıge taıyp otyrǵan. Olardy áleýmettik jeli arqyly taýyp alyp sóıleskenimizde, biz onymen tura almaımyz. Sender zeınetaqysyna kútýshi jaldańdar degen jaýap aldyq», deıdi kórshisi Janna Eltaeva bezbúırek perzentteri jaıly.
Qysta dálizde oqystan qulap, omyrtqasyn syndyryp alǵansha zeınetker kúnin eshkimge túsirmegen. Tósek tartyp qalǵaly kórshileri tıisti mekemelerge shaǵymdanyp, qarttar úıine alýdy ótingen. Memlekettik mekemege kezek kóp bolǵandyqtan, qalalyq jumyspen qamtý bólimi qujattaryn jekemenshik qarttar úıine rásimdep jatsa kerek.
Petropavl qalalyq jumyspen qamtý jáne áleýmettik baǵdarlamalar bólimi basshysynyń orynbasary Aqqanat Jákenova taıaý kúnderi máseleniń sheshiletinine sendirip otyr.
О́mir Esqalı.
Derek: KTK telearnasy.
Sýret: egemen.kz