Kúmbirlegen kóktem kúıi

Bul – Áz Naýryzdyń sánin keltirgen saltanattyń biri ǵana emes, kúı arqyly ulttyń  ishki álemin jetkizgen rýhanı kesh boldy. Sahnada shyrqalǵan árbir týyndy – kóktemniń lebi, dalanyń tynysy, qazaqy bolmystyń úni ispetti. Keshke jınalǵan jurttyń quramy da soǵan saı. О́ńirdiń zııaly qaýymy, mádenıet salasynyń ókilderi, ónerge jany jaqyn kórermen bir zalda toǵysty.

Kesh Seken Turysbektiń «Málgajdar» kúıimen, «Bıbigúl» qazaq halyq aspaptar orkestriniń oryndaýynda ashyldy. Múkeıdiń «Qosbasqan qońyry», Jantóreniń «Shalqymasy», Málǵajdar Áýbákirovtiń «Talas» kúıleri oryndaldy. Sahna tórinde saz­syrnaıyn syzyltyp Móldir Qısamedınova «Kelshi aıym» shyǵarmasyn jeke oryndaýda jetkizdi. Al orkestrdiń súıemeldeýimen oryndalǵan «Arý ana», «Uly dala», «Jolaýshy» kúıleri ulttyq sarynnyń keń tynysyn ashyp, kórermenge kúıdiń kórkem keńistigin ashty. Budan soń kesh qonaǵy, mádenıet salasynyń úzdigi Bıbigúl Qılymhan oryndaǵan «Asyl ana», «Qońyr qaz», «Kóktemim meniń, kóktemim» ánderi shalqydy. Aqyn Nesipbek Aıtuly men Iran-Ǵaıyptyń sózderine jazylǵan bul týyndylarda anaǵa degen qurmet, tabıǵat­tyń jańǵyrýy, adam janyndaǵy názik sezimder astasyp jatty. Sonymen qatar Aıdan Baýyrjanuly, Tańat Muqashev án shyrqady. Seken Turysbektiń oryndaýyndaǵy «Aqsháýli», «Sekenniń qońyry», «Daraboz», «Kóńil tolqyny» kúıleri kórermendi erekshe kúıge bóledi. Aıaýlym Qýanyshbekovamen birge oryndalǵan «Aqjaýyn» kúıi aıryqsha shyqty. Kesh sońynda shyrqalǵan «Erke qusym» áni men Táttimbettiń «Sarjaılaý» kúıi konserttiń mazmunyn túıindep, ulttyq ónerdiń máńgilik tynysyn taǵy bir márte aıqyndap berdi.

«Naýryz merekesi dep jurtqa shýaqty kúnder syılaǵan boldyq. Kóktemniń kóńil kúıin berýge tyrystyq. Konserttik baǵdarlamany da soǵan qaraı yńǵaıladyq. Kesh kóńilden shyqty dep oılaımyn. Bizdiń Semeıdiń kórermeni bólek. Talǵam, tanym da basqa», deıdi kúıshi.

SEMEI