Soltústik Qazaqstan oblysynyń Taıynsha aýdanynda bir ınvestor segiz aı boıy qoı basyn 1 myńǵa deıin arttyrýdy kózdegen ınvestısııalyq jobasyn iske asyra almaǵan. Kásipkerdiń jumysyna kedergi keltirip, zańsyz áreketke barǵan memlekettik organnyń isi prokýratýranyń aralasýymen áshkerelendi.
Anyqtalǵandaı, Veterınarlyq baqylaý jáne qadaǵalaý komıtetiniń jergilikti ınspeksııasy tıisti qorytyndyny berýden negizsiz bas tartqan. Vedomstvo ókilderi qoı sharýashylyǵy irgeles jatqan Tapshyl aýyly turǵyndarynyń múddesine qaıshy keledi jáne sanıtarlyq-qorǵaý aımaǵyna kirip ketedi degendi syltaý etken. Tıisti qujattyń berilmeýi saldarynan ınvestor eseptik nómir ala almaı, jobany iske qosý múmkindiginen aıyrylǵan.
Tapshyl aýyly qazirgi tańda taraý aldynda turǵan eldi meken sanatyna jatady. Munda nebári bes turǵyn ǵana qalǵan. Aýdan ortalyǵynan 35 shaqyrym qashyqta ornalasqan aýyl turmysqa qolaıly bolǵanymen, jergilikti halyq nápaqa izdep, ózge óńirlerge qonys aýdarǵan. Osy oraıda, bos qalǵan aýyldy syltaýratyp, aýdan ekonomıkasyna serpin bermek bolǵan ınvestordyń jolyn bógegen memlekettik organnyń bul áreketi kúmán týdyrady.
Byltyr jeltoqsan aıynda Bas prokýratýra janynan Investorlardy qoldaý jónindegi front-ofıs quryldy. Qazirgi tańda jalpyulttyq pýlda quny 894 mlrd teńgeni quraıtyn 51 ınvestısııalyq joba bar kórinedi. Atalǵan jobalardyń júzege asýyna jergilikti jerlerdegi keıbir memlekettik organdar tarapynan jasalǵan zańsyz kedergilerdi joıý maqsatynda prokýratýra organdarynyń tikeleı aralasýyna týra kelgen. Soltústik Qazaqstan oblysynyń prokýratýrasynda da ınvestorlardyń quqyn qorǵaý toby qurylyp, qazir jumys istep jatyr. О́tken jyldyń aıaǵynda ǵana atalǵan top 30 problemalyq jobanyń iske asýyna septigin tıgizdi. Máselelerdiń jedel ári ońaı sheshilýi kedergilerdiń kóbine qoldan jasalǵanyn aıǵaqtaıdy. Jańa jyl bastalǵaly prokýratýranyń aralasýymen ekinshi márte ınvestısııalyq jobanyń kedergisiz iske asýy qamtamasyz etildi.
Soltústik Qazaqstan oblysy prokýrorynyń aǵa kómekshisi Qazbek Ǵalymjan prokýratýra aralasqannan keıin ınvestorǵa veterınarlyq-sanıtarlyq qorytyndy jasalyp, eseptik nómir berilgenin jetkizdi.
«Endi ınvestor alańsyz jumysqa kirise alady. Kederginiń zańsyz ekeni anyqtaldy. Qazirdiń ózinde ol 25 mln teńge sýbsıdııa alýǵa tapsyrys berdi», dedi.
Árıne, ınvestordyń quqyǵy qalpyna keltirilgeni kóńil qýantady. Alaıda segiz aı boıy bıznestiń óristeýine zańsyz tusaý bolyp, jobany tejegen memlekettik organnyń jaýapkershiligi qaıda? «Joǵalǵan tabys» degeni nege eseptelmegen? Prokýratýra óz qolynan kelmese mundaıdy eseptep, memlekettik organnan sot arqyly óndirip bermeı me?
Prokýratýranyń ádil sheshim izdep, el ıgiligi úshin eńbek etpek bolǵan ınvestordy qoldaǵany tek osymen shektele me? Investısııalyq jobalarǵa túrli syltaýmen, tipti qasaqana kedergi keltirgen memlekettik organdar jazasyz qala berse, elde «Zań men tártip» qaǵıdatynyń ornaýy ekitalaı. Prokýratýra bir óńirdegi túıindi tarqatqanymen, ózge jerdegi keleńsizdiktiń bári birdeı nazarǵa ilige bermeýi múmkin. Eger zańsyzdyqqa jol bergenderge qatań shara qoldanylsa, memlekettik organdar tarapynan jasalatyn qoldanbaly kedergiler de azaıar edi. Osy oraıda prokýratýranyń zańsyzdyqqa qarsy kúresin áli de bolsa júıeli emes, jartykesh sıpatta dep baǵalaýǵa týra keledi.
Soltústik Qazaqstan oblysy