KAZENERGY qaýymdastyǵy alańynda janar-jaǵarmaı naryǵyndaǵy baǵa qalyptastyrýdyń ózekti máseleleri men aldaǵy qadamdaryna arnalǵan kezdesý ótti, dep habarlaıdy Egemen.kz.
Talqylaýǵa sarapshylar, salalyq qaýymdastyqtar, naryqtyń túrli segmentteriniń ókilderi, «QazMunaıGaz» UK AQ jáne memlekettik organdar qatysty.
Negizgi nazar AI-92 markaly benzın men dızel otynynyń baǵasyn retteý máselelerine aýdaryldy.
Naryq qatysýshylary qoldanystaǵy baǵa shekteýleri óndiristik, logıstıkalyq jáne operasııalyq shyǵyndardyń ósýimen qatar barlyq qatysýshylarǵa qosymsha júkteme túsirip, jalpy salanyń turaqtylyǵyna keri áser etetinin atap ótti.
Sondaı-aq makroekonomıkalyq faktorlardyń yqpaly jáne retteý sharttarynyń ózgerýi munaı ónimderiniń ózindik quny men jetkizý tizbeginiń jumys isteýine áser etetini erekshe aıtyldy.
Aqtaýda Qazaq Oil janarmaı beketinde órt shyǵyp, jeńil kólik órtendi
Sarapshy Nurlan Jumaǵulovtyń pikirinshe, naryqtyq faktorlardy elemeý jáne kórshi eldermen baǵa aıyrmashylyǵynyń aıtarlyqtaı bolýy «sur» eksportqa jaǵdaı jasaıdy. Iаǵnı arzan otyn zańsyz túrde elden shyǵarylyp, ishki naryqta jasandy tapshylyq qaýpin týdyrady. Baǵalardy kezeń-kezeńimen teńestirý bul táýekelderdi azaıtyp, ishki naryqty turaqty qamtamasyz etýge múmkindik beredi.
Sarapshy Erlan Jaýkın atap ótkendeı, baǵany retteý salanyń ınvestısııalyq múmkindikterin shekteıdi. Al qoldanystaǵy úsh munaı óńdeý zaýytyn jańǵyrtý jáne keńeıtý, sondaı-aq jańa, tórtinshi MО́Z salý úshin qomaqty resýrstar qajet.
Naryqtyq jaǵdaılardy damytý munaıdy óńdeý tereńdigin arttyrýǵa jáne ınvestısııalar tartýǵa qosymsha yntalandyrý beredi. Bul eldiń energetıkalyq qaýipsizdigin qamtamasyz etýdiń negizgi faktorlarynyń biri sanalady.
Osyǵan baılanysty qatysýshylar moratorıı merzimi aıaqtalǵannan keıin naryqtyq baǵa qalyptastyrýǵa kóshý naryqtyń turaqtylyǵyn arttyrýdyń mańyzdy faktory bolýy tıis ekenin atap ótti. Bul baǵanyń ashyq qalyptasýyn, onyń ekonomıkalyq negizdiligin jáne uzaq merzimdi turaqtylyǵyn qamtamasyz etedi.
Qańtardaǵy ınflıasııa 12,2%: Janarmaı baǵasy ósip jatyr
Sonymen qatar, máseleniń áleýmettik sezimtaldyǵyn eskere otyryp, baǵany kezeń-kezeńimen arttyrý qajettiligi erekshe atap ótildi. Naryqtyq tetikterge kóshý halyq tabysy men aǵymdaǵy ekonomıkalyq jaǵdaıdy eskere otyryp, birtindep júzege asyrylady. Bul baǵanyń kúrt ózgerýin boldyrmaı, tutynýshylar úshin kúızelisti ssenarıılerdiń aldyn alýǵa múmkindik beredi.
Kezdesý qorytyndysy boıynsha qatysýshylar ustanymdardy biriktirip, baǵa qalyptastyrý tetikterin jetildirý boıynsha kelisilgen usynystar daıyndap, olardy ýákiletti memlekettik organǵa joldaýǵa kelisti.
Janarmaı jaıyn talqylaǵan keńes
Jalpy alǵanda, janarmaı naryǵynda erkin baǵa qalyptastyrý munaı óńdeý salasyn damytýǵa, ınvestısııalar tartýǵa jáne áleýmettik turaqtylyqty saqtaı otyryp, tutynýshylar múddesin qorǵaýǵa baǵyttalǵan strategııalyq qadam retinde qarastyrylady.