Shymkentte ótken «Digital Qazaqstan» forýmynda memlekettik qarjy júıesin jetildirýge baǵyttalǵan jańa sıfrlyq sheshimder kópshilik nazaryna usynyldy. Qarjy mınıstrligi Elektrondyq qarjy ortalyǵymen birlesip ázirlegen «Memlekettik qarjynyń sıfrlyq kartasy» modýli taýar aınalymyn taldaýdyń jańa múmkindikterin ashyp, ekonomıkalyq úderisterdi jedel baǵalaýǵa jol bermekshi.
Forýmda Qarjy mınıstrligi Elektrondyq qarjy ortalyǵymen birlesip júzege asyrǵan «e-Qarjymıni» aqparattyq júıesindegi «Memlekettik qarjynyń sıfrlyq kartasy» modýliniń múmkindikterin tanystyrdy. Jańa qural elimizdegi taýar aınalymynyń tutas kórinisin qalyptastyryp, óńirler bólinisinde qoljetimdi ári naqty analıtıka jasaýǵa múmkindik beredi.
Ozyq sheshim Qazaqstan kartasy negizinde bólshek saýda kórsetkishterin vızýalızasııalap, keń aýqymdy taldaý júrgizýge jaǵdaı jasaıdy. Júıe baqylaý-kassalyq mashınalar derekterin, saýda nysandary men ákimshilik-aýmaqtyq birlikterdi qamtyp, biryńǵaı analıtıkalyq baza qalyptastyrady. Ártúrli kezeńder boıynsha salystyrmaly derekterdi saralaýǵa, taýarlar reıtıngin aıqyndaýǵa, óńirlik erekshelikterdi baǵalaýǵa múmkindik bar.
Qoldanystaǵy nusqada taldaý fıskaldyq chekter negizinde júrgiziledi. Aldaǵy ýaqytta elektrondyq shot-faktýralar men taýarlarǵa ilespe júkqujattardy biriktirý josparlanǵan. Bul derekter aýqymyn keńeıtip, taldaýdyń dáldigin arttyrýǵa yqpal etedi. Ulttyq katalogtegi taýarlardyń biregeı sıfrlyq kody – NTIN ıdentıfıkatoryn qoldaný aqparatty sáıkestendirý men salystyrýdy jeńildetedi. Bıylǵy 1 qańtardan bastap NTIN qoldanýdyń mindettelýi taýar aınalymyn ashyq ári salystyrmaly taldaýǵa negiz qalady.
Modýl óńirler, saýda nysandary men salyq tóleýshiler deńgeıinde salystyrmaly taldaý júrgizýge jol ashady. Suranys qurylymy men taýar aǵyndaryndaǵy ózgeristerdi jedel anyqtaýǵa múmkindik beretin júıe ekonomıkalyq belsendiliktiń naqty kórinisin usynady.
Qarjy vıse-mınıstri Áset Turysovtyń aıtýynsha, sıfrlyq karta negizindegi taýar analıtıkasy ekonomıkalyq úderisterdi taýar men aýmaq turǵysynan baǵalaýǵa jaǵdaı jasaıdy. Bul tutynýshylyq qurylymdy tereńirek túsinýge ári ózgeristerge der kezinde den qoıýǵa kómektesedi.
Forým barysynda «Kásipkerdiń biryńǵaı jeke kabıneti» jobasy da tanystyryldy. «Bir tereze» qaǵıdatyna negizdelgen bul júıe bıznes ókilderiniń mınıstrlik aqparattyq júıelerimen ózara is-qımylyn jeńildetýge baǵyttalǵan. Portal memlekettik qyzmetter men derekterdi bir keńistikte biriktirip, kásipkerlerdiń qajetti servısterge jedel qol jetkizýin qamtamasyz etedi.
Kabınet fýnksıonaly biryńǵaı avtorızasııalaý, rólderdi basqarý, qyzmetkerlerge ókilettik berý, ortalyqtandyrylǵan habarlandyrý júıesi, kontragenttermen ózara baılanysqa arnalǵan ishki chat, analıtıkalyq quraldar men derekterdi vızýalızasııalaý qyzmetterin qamtıdy. Budan bólek, jasandy ıntellekt negizindegi bıznes-kómekshi men salyq servısteri engizilgen. Júıe memlekettik aqparattyq platformalarmen yqpaldasa otyryp, bıznes úshin birtutas sıfrlyq ekojúıe qalyptastyrýǵa baǵyttalǵan.
Qazir júıede 15 myńnan astam paıdalanýshy tirkelgen. Bazalyq fýnksıonal iske qosylyp, servısterdi jetildirý jumystary jalǵasyp jatyr. Joba barysynda kásipkerlerdiń usynystary da eskerilgen.
Á.Turysovtyń pikirinshe, bul bastama memleket pen bıznes arasyndaǵy ózara yqpaldastyqtyń tıimdi modelin qalyptastyrýǵa múmkindik beredi. Biryńǵaı sıfrlyq orta ákimshilik júktemeni azaıtyp, úderisterdiń ashyqtyǵyn arttyrady.
«Digital Qazaqstan» forýmynda usynylǵan jańa sheshimder memlekettik qarjy júıesiniń taldamalyq ınfraqurylymyn damytýǵa ári kásipkerlerge arnalǵan zamanaýı sıfrlyq qyzmetterdi keńeıtýge baǵyttalǵan keshendi jumystyń jalǵasy sanalady.